MJA Lunglei District chuan National Highway 302 – Lunglei leh Tlabung inkar kawng sial mek chu Ningani khan an tlawh a. Tun dinhmunah Lungsen to Tlabung inkarah kawng black top loh engemawzat awmin ruah a sur chuan LMV tan tlan harsa tak tak a awm tih an sawi.
MJA Lunglei chuan Phairuangkai leh Tuichawng lei dinhmun en nghalin, lirthei lian zawh theih a ni loa, siamthat tura buaipui mek a ni tih an sawi.
Lungsen leh Tlabung inkar kawng pawh contractor-ten an lai mek a, Tuichawng leh Tlabung inkar erawh EF&CC department-in stay order an pek avangin hnathawh chawlh lailawk a ni a. India (Mizoram) leh Bangladesh inrina, Kawrpuichhuah pawh an tlawh a, Nunsury khua pawhna atana Khawthlangtuipui chunga lei dawhna tur hmunhma an en nghal a ni.
NH 302 Kawngpui Ngaihventu Pawl Tlabung nen an inkawm a. Kawngpui ngaihventute chuan he kawng siam nana company lamin lung chang tha lak tur helai kawngah hian a awm lo an tih chu thudiklo a nih thu leh laboratory-a an endik vek hnuah lung tha a awm tih an hmuh thu an sawi a. Phairuangkai leh Tuichawng Chhumkhum khaw bul ami, Rolui chu kawng laihna vungin a tichhia a, he lui fintu pawh leivungin nasa takin a tichhe tawh tih sawiin, sawrkar laipuiin kawng siam nana sum tam tak a dah lai a, sum an hmang tha lo chu pawi an tih thu an lo sawi a ni.
MJA-in kawng sial mek enfiah
