MLA atangin speaker a bang
BJP ticket-in MLA chuh dawn
Mizoram Legislative Assembly speaker, Chalfilh bialtu ni bawk Lalrinliana Sailo chuan MLA a nihna chu a bansan a, BJP-ah lawmluh a ni ang a, an party ticket-in kumin MLA inthlanah a chuh dawn.
Nilaini khan Assembly Secretariat commissioner & secretary Lalhmahruaia Zote hnenah Lalrinliana Sailo hian MLA a nihna atanga banna hi ziakin a thehlut a. Hemi hnua thuthar thehdarhtute zawhna chhangin, BJP ticket-a a dinna tur bial hi sawi ho chu a awm tawh naa, tihchian ala nih loh avangin sawi nghal a la rem lo tih a sawi.
MLA atanga bang Lalrinliana Sailo chuan Mizoram sum dinhmun a pachhe tawh takzet a, centre-a BJP sawrkar puihna in tungding tura hma lak a tum tih a sawi. State sum tam tak senga Mizoram sawrkarin a enkawl mek Zoram Medical College puitlin nan tha a lo thawh ve tih sawiin, central sawrkar enkawl tura lak an tiam avangin BJP zawm tum a ni tih a sawi.
Myanmar atangin kuhva tawlhruk a nasa hle tih sawiin, kumin chhungin Mamit district mipuiin cheng vaibelchhe 40 chuang an hloh tawh tih a sawi a. Myanmar atanga kuhva tawlhruk titawp turin Assam chief minister Himanta Biswa Sarma nen an inbia a, BJP a zawm chuan Mamit district-a kuhva chingtuten harsatna an tawh loh nan theihtawp chhuah pui a tiam niin a sawi.
Border trade kal hleithei loh chu state budget atangin hmasawnna siam a harsa tih Lalrinliana Sailo hian sawiin, Trade & Commerce minister a nih laia a lo buaipui tawh borderr trade chu tha takin kal se a duh a, centre-a BJP sawrkar chuan theihtawp chhuahpuia hma lak an tiam avangin BJP a zawm chhan pakhat a ni tih a sawi bawk.
MLA pariat bang ta te hnung zuiin banna a thehlut ve tih sawiin, mittui tla chung leh hreh tak chungin Lalduhoma chu MLA atanga a ban thu a sawi a. Lalduhoma nen inpawhna tha tak an nei tih sawiin, thla hnih lai ban lo tura a ngen angin ban tura an tih hun pawh a bawhpelh hial tih a sawi a ni.
MLA atangin speaker a bang BJP ticket-in MLA chuh dawn
