State sawrkar chuan MLA 40 hnenah MLA Fund zatva, cheng nuai 100 theuh a pechhuak.
The Aizawl Post thudawn danin, MLA Fund hi kumin July khan pekchhuah tura tihfel a ni tawh a; instalment engzatin nge pek theih a nih dawn tih sawrkar hotute chuan an sawi lawk thei rih lo a ni.
ZPM Gen. Hqrs. thuchhuak chuan, ZPM kaihhruai kalphung thar sawrkarah MLA-te hnenah MLA fund zatve theuh tum khata pek chhuah a ni chu lawmawm a tih thu sawiin, ‘Sawrkar hun dangah chuan MLA fund hi tlem te te-in, instalment 4 tea pek a ni thin a, MLA leh bial mipui tan hmasawnna hna tak tak thawh dawnin a buaithlak thin hle. Kalphung thar sawrkarah MLA 40-ten cheng nuai 100 theuha an chan tur cheng vaibelchhe 40 pek chhuah a ni hi sawrkarin hmasawnna hna thawh kawng a taka a ngaihtuah zia a tilang chiang a, ruling mai ni lo, opposition MLA-te pawhin thlamuanthlak an ti hle,’ a ti.
MLA Fund, MLA Local Area Development Scheme chu bial chhung cheina tur leh bial mipui tihhmasawnna tur a nih avangin sawrkar tharin a ngaipawimawh a; MLA fund pawh kum khata nuai 150 ni thin chu nuai 200-ah tihbelh a ni tawh tih a sawi bawk.
Tun tuma MLA bial 40-te chanpual MLA fund zatve tum khata pek chhuah a ni hian MLA zawng zawngten an bial chhunga hmasawnna hna an thawh kawngah kawngro a sut ngei an beisei tih ZPM thuchhuah hian sawiin, ‘Sum enkawl kawnga a ngaihna hria, finance changtu chief minister Pu Lalduhoma leh adviser to CM i/c Planning & Finance Pu TBC Lalvenchhunga bakah Planning & Programme Implementation department-a thawktute kan chhuangin an chungah lawmthu kan sawi a ni,’ a ti.
MLA Fund nuai 100 pechhuak
