MLP Act siamthat a taka
hman dan tur ngaihtuah
Mizoram State Policy Coordination Committee chuan an vice chairman, adviser to chief minister Dr KC Lalmalsawmzauva hoin Nilaini khan Mizoram Liquor (Prohibition) Amendment Act 2025 kalpui dan tur sawiho a ni.
Sawihonaah hian MSPCC member-te bakah Excise & Narcotics department, Commerce & Industries department, Horticulture department, Food & Drugs Administration, All India Wine Producers Association, Mizoram University Department of Food Technology leh wine siamtu aiawhte an tel.
MSPCC vice chairman chuan Mizorama thei tharchhuah hmanga thianghlim leh mumal taka wine siam a nih theihnan MLP Amendment Act 2025 duan a ni a. Thei thartute tan inhralhna tha zawk buatsaih sak, hemi kawnga hma la entrepreneur hipna atan, zinmite hipna atan leh dan leh tehfung hrang hrang behchhana thianghlim taka wine sawngbawl a nih theihnan a kaihhnawih sawrkar department, winery neitute leh kuthnathawktute tanrual a pawimawh tih a sawi.
Excise & Narcotics commissioner Z Lalhmangaiha chuan Mizorama zu khuahkhirhna kalpui tawh dan leh MLP Amendment Act 2025 danglamna powerpoint presentation hmangin a sawizau a. He dan thar hian Autonomous District Council-a huam tel tih a sawi.
Food & Drugs Administration atangin wine leh beer kaihhnawiha Food Safety and Standard Authority of India hnuaia inkaihhruaina an sawizau a. Wine-ah hian ethyl alcohol zaa 7- 15.5 a ni tur a ni a, beer-ah 5-8 inkar a ni tur a ni. Mizoramah winery pali – Hnahlan, Champhai, Tlangsam leh Sesawng a ni.
Hmalakna hlawhtling taka kalpui a nih theihnan thei chi khat a huhoa hmun khata chin (cluster approach) a pawimawh thu, a sawngbawlna endik dan tur, sawngbawltu tur leh zuar turte license pek dan tur sawi a ni a. Winery lama tui, bultan tum leh winery-a thawk turten thiamna rintlak an neih theihnan training buatsaih thin nise, chumia hman tur ‘training module’ siam nise an ti.
MLP Act siamthat a taka hman dan tur ngaihtuah
