MNF inkhawmah rilru hrisel inzirtir

MNF inkhawmah rilru hrisel inzirtir
MNF party chuan rilru hrisel nei turin hetiang lama mithiam chu an inkhawmah an sawm.
Thawhtannia MNF office-a inkhawmah Mizoram University Psychology head of department Prof. Zoengpari chuan rilru hrisel chungchang hi a sawi a. Mihring rilru a hrisel a pawimawh, tiin, “A langa tha tak anga lang, chhungril lam kha si, beisei leh duhdan ang ni lo engemaw a lo thlen changa buai phili chung, midang mawhpuh tur zawng reng mi a awm theih a. Retheihna, harsatna leh lungngaihna a lo thlen changa indawmkun mai loa, hahdam zawk leh a eng zawnga thlir thiam thin hi rilru hrisel an ni,” a ti.
Politics-ah pawh duh dan anga thil a thlen loh changa thil thleng hmachhawn thiam chu rilru hrisel neite an ni tih a sawi a. Kum upat deuh avangin rilru hrisel lo chuan hmalam kawngah beiseina an nei lo a, an beidawng a, rilru hriselte chuan an upat deuh pawhin hlim taka hmachhawn dan an thiam thin tih a sawi a ni.
“Sum ngainat leh hlemhlet hi mahni theuhah inteh chhin i la; miin min ngaihdan leh min teh dan a pawimawh zawk tih hriatreng tur. Ka hlawhtling a, ka hausa tho tih avanga mite venthawn loh hi thil thalo leh rilru hrisel lo tak a ni,” Prof. Zoengpari hian a ti.
Sum enkawl chungchangah hmeichhiate mawhphurhna a sang hle, tiin, “Sum lakluh mila hman daihzai thiam a ngai a, hei hian kan tu leh fate hma hun a hril thui viau. Kan tu leh fate hi tunlaiah an intichangkang tawh a, an rilru a danglam tawh. Nu leh pa, an pi leh pute hi ni khatah vawikhat tal koh tir ngei ngei hi inlaichinna tha siamthatu a ni,” a ti.