- ZPM Thalai
MNF leh Congress sem policy-in
kuthnathawktute a thleng pha lo
- ZPM Thalai
MNF leh Congress-in an sawrkar laia budget-a kuthnathawktute tan bika sum an dah chu mi party member leina atan leh an party worker dawmkannaah an hmang ber zawk tih ZPM Thalai chuan an sawi.
ZPM Thalai Hqrs. thuchhuak chuan, Finance department RTI chhanna atangin kum 2008 atanga 2023 thlengin MPCC leh MNF-in NLUP leh SEDP ah cheng vaibelchhe 4090.66 (NLUP vbch.2896.91 leh SEDP vbch.1193.75) an hmangral a, heng sum hi budget-ah chuan kuthnathawktute pual liau liaua dah a nih laiin, Congress leh MNF hian party member inleichhawn sakna atan leh an party worker-te dawmkanna atan an hmang ber tih chu mipui hmuh leh hriat dan a ni tih a sawi.
ZPM sawrkar chuan 2025- 2026 budget estimate-ah Bana Kaih policy atan vbch.350 dahin, an intiam angin party bil sawi loin, a thar chhuak apiang hnenah sawhthing, hmarcha, aieng, hmunphiah leh buh hralh kawngah hma a la a, buaipui ngai ber sawhthing market bikah support price atan vbch. 96.4 a hmang tawh a, secondary collection centre tinin invoice an upload kim hunah sawhthing atangin Mizoram loneitute kutah vbch.120 vel lut tura ngaih (estimate) a ni tih a sawi a ni.
Tun dinhmunah India ram hmun hrang hranga Mandi wholesale rate-ah sawhthing hi kg khat Rs. 8- 16 a nih mek laiin, ZPM sawrkar policy avanga Mizoram loneitu diktakten kg ah Rs.50 a sawhthing an hralh thei hi sawi hnawm chi ah ZPM Thalai chuan a ngai loa, society hruaitu hrang hrangin Bana Kaih policy avanga lawmthu sawina thuchhuah an siam hi sawrkar policy hlawhtlinnaah ZPM Thalai chuan a ngai tih a sawi bawk.
‘MNF leh Congress-in kum 36 chhung an flagship programme hmanga kuthnathawktute sum sem policy hmanga an lilam kual hnu in, kuthnathawktu hmangaihna tak tak thinlung putu chief minister leh ZPM sawrkar policy avanga kuthnathawktute tan a kawl a eng ve tawh tur hi kan lawmpui a, kuthnathawkte hlim hmel hmuh hi opposition party-te hian zir ve se, kuthnathawktute tana ZPM sawrkar policy aia tha zawk duang chhuak turin kan ngen a ni,’ a ti.