2028 inthlanpuia an party manifesto leh sawrkar huna programme tur chu mithiam rual telna Drafting Committee in an buatsaih mek niin MNF hruaitu Dr R Lalthangliana chuan a sawi.
Champhai district tlawha fehchhuak MNF senior vice president Dr R Lalthangliana, MLA hian Thawhtanni khan MJA Champhai District member-te a kawm a. Champhai khawpui hmasawnna tur an sawiho.
Sawrkarna an chan huna an programme tur chu Drafting Committee, mithiam rualin an buatsaih mek a, Sub Committee peng pasarihin an peihfel thuai a beisei tih a sawi a. Sawrkarna an chang a nih chuan thuneihna semzai (decentralization of power) an ngaipawimawh dawn tih sawiin, Aizawl leh Lungleia municipality kalpui mek chu MNF sawrkar ruahman leh tihpuitlin a ni tih a sawi.
Champhai khawpui chhung kawngpui tam zawk a chhe lutuk chu vanduaithlak a tih thu sawiin, Champhai leilet zawl chu buh chauh ni lo, thil dang tharchhuahna tura buatsaih tul a tih thu a sawi bawk.
Champhai MJA hian Champhai mamawh nia an hriat an sawi a. Seling to Zokhawthar National Highway kawng chhe tawh siamthat a tul thu, Champhaia Polytechnic leh ITI awm tura tih, a building leh thil dang fel tawh, a taka tihpuitlin la ni lo te, Champhaiah State University Eastern Campus emaw post graduate zirna emaw dah, Higher Secondary School pakhat chauh a la awm reng chu a dang dah belh, Champhai khawpui tui harsatna sutkianna atan Greater Champhai Water Supply Scheme Phase-II kalpui thuai a tul thute an sawi a ni.
MNF manifesto leh programme turte Drafting Committee-in buatsaih mek – Dr R Lalthangliana
