Nikum kum tawp lamah minister a nihna atanga bantir a ni a, Siaha lamah a awm mek. Siaha-ah hian mipuiin an lo lawm a, ropui takin an lo hmuak nghe nghe.
Minister of state a nihna atanga a ban hnua a bial lama kir leh Dr K Beichhua hi party atanga chhuak tura ngai an awm a, Siaha lamah pawh MNF atanga chawlhtir te an lo awm bawk nen, Mara District MNF an lungrual lovah ngaih a ni. Amah Dr Beichhua erawh chuan MNF a la nih reng thu a sawi.
“MNF ka ni a, MNF MLA ka la ni reng,” a ti a, a chungchangah titi a awm thu leh, a lo hriat ve thin thu te sawiin, thu thar engmah a nei lo niin a sawi.
Siaha-a amah lo hmuaktu mipuite chu “min duhsaktute” tiin a sawi a, “Minister ka’n ni ta lo kha min lainat a, min duhsaktute’n min lo hmuak a ni,” a ti.
Krismas hmaa Siaha-a a haw chuan an boruak a sang lutuk ang tih a hlau a, boruak daih deuh hun nghakin kum thar a nghak niin a sawi.
“Party party a awm lo a, mipui an ni a. ZPM phei chuan an flag te an rawn keng a,” a ti a, party sawi lovin mipuiin an lo hmuak niin a sawi.
“Party dangah a chhuak dawn tia min sawina te pawh ka hria a,” a ti a, “BJP-ah a lut ang min ti a, ZPM-ah a lut dawn min ti a, Congress-ah a lut ang min ti a. Hei hi chu, an ngaihruat ve a ni mai,” a ti.
Mara District MNF an khi em tia zawhna chhangin Dr Beichhua chuan, “A boruakah chutiang phut phut a awm ka hre lo,” a ti a, MNF atangin chhuak se amah zuitu an lian ang em tih zawhna pawh, “Chutiang ka ngaihtuah lo,” tiin a chhang.