MNF president-in OB ruat belh Party dang pawh an inruat belh – Zoramthanga

MNF president-in OB ruat belh
Party dang pawh an inruat belh
– Zoramthanga
MNF president Zoramthanga chuan working president leh vice president a ruat belh a, senior vice telin vice president-ah mi pali an awm.
Thawhtannia Mizo Hnam Run inkhawmah MNF president hian an danbu in thuneihna a pek angin, an party chak zawk leh tluang zawka a kal zel theihnan working oresident-ah Tawnluia, Chawnpui; vice president-ah Lalchamliana, Electric Veng leh, D Thangliana, Khatla a ruat tih a puang.
ZPM-in general headquarters inthlan an huphurh hle a, inthlan tum loin, vice president engemawzat an ruat belh a. Congress pawh an inthlang dawn loa, vice president an inruat belh zel a. MNF pawh nakkum an party inthlan hun a ni a, inthlang ta se, elected OB thar, NCC, PAC, adviser, GS, secretary leh frontal zawng zawng a vaia inruat thar a ngai dawn a. Promotion beisei nei mi tam tak kan tikhaih lak thei bawk tih a sawi.
“Term danga kan lo tih thin fo tawh angin, party inthlan hi MLA inthlan dawn a ruaiah kan nei ngai loa, MLA inthlan zawh hunah kan nei zawk dawn. Party dang pawhin an ti vek a, kan dan-in president thuneihna a pek angin, hetiang hian kan party chak lehzuala a kal theih nan kan inruat thar a ni,” a ti.
1986 June 30-a inremna chu Mizoram mipui tan chhinchhiahtlak leh pawimawh ber a ni a, India ram hruaitute leh khawvel ram dang hruaitute pawhin ropui an tiin min ngaih hlutsak hle tih MNF president hian a sawi.
“Kan inremna kha min beituten tunhma pawhin min sawinep sak an tum thin a, mipuiin an awih duh lo a, an sim hman viau. Mahse, tunhnaiah Pu Duhoma’n MNF tih chhiat theihna kawng awmchhun nia a hriat vangin a rawn phawrh leh a ni. Hmuh theihin document dik tak a la awm vek a. Pu Duhoma hian dawt a zawnga dawt lian ber a sawi a. Khatiang a sawi avang khan beitu a ngah tan viau a, a zuzina atan thil hrang hrangin a sawikual hnan leh a ni,” a ti.