Ramri chungchangah nghet taka MNF sawrkar a ding ang khan ZPM sawrkar chu ding ve turin a beisei tih Rajya Sabha MP K Vanlalvena chuan a sawi.
Thawhtannia MNF office Mizo Hnam Runa inkhawmah K Vanlalvena chuan MNF sawrkar laiin kum 5 chhungin hnam thilah fiahna tawng fo mah se, an chesual loa a hriat thu sawiin, “Tun sawrkar thar pawh hian fiahna a hmachhawn ve tan a. Sawrkar laipui chuan Myanmar border/ inkalpawhna km.16 ve ve zalena khawsak theihna chu kan hung vek ang, tiin thu a chhuah a. Sawrkar thar ka ngen duh chu, MNF sawrkar nghet taka kan ding ang khan ramri ah nghet takin ding ve rawh se, kan hnam kan chhan vanga hmasawnna turin a thuanawp dawn a nih pawhin hnam chhan nan ding zel turin ka chah duh a ni,” a ti.
Tuna ram leh hnam thlavang kan hauh ngam loh chuan nakin zel atan a pawi dawn tih a sawi a. Tiau chu Mizoram ri ah Mizoten kan pawm ve ngai loa, hung pawh kan remti lo tih sawiin, “An hung duh a nih chuan Tiau kam niloin Chindwin luikamah han hung se; khimi thlenga an hung dawn lo a nih chuan India sawrkar hian rawn hung suh se,” a ti.
Khawvelah hnam thila huai taka hma latu chu inthlanah thlauhthlak an ni tawh thin tih a sawi a. British prime minister hlui Winston Churchill pawh indopuia hnehna chanpuitu ni mah se, eibar lamah a ramin harsatna a tawh phah avangin tih tlak a lo ni tawh tih a sawi. “Keini pawh hnam thila huai taka kan pen laiin, ramchhung inrelbawlna lamin harsatna a tawh phah nasa a, kan Pathian thu thu in awm ila, mahni inhaivur leh chhungte haivur tum loin, martar-te thisenah kir leh ang u,” K Vanlalvena hian a ti.
MNF sawrkar angin ramria ding nghet turin ZPM beisei
