MNF sawrkar khan ama thuchhuah vek kalhin school 180 chu sawrkar school-ah a hlangkai a. Sawrkar hnathawk hlawh pawh pe mumal thei lo khan vawi lehkhatah zirtirtu 1300 chuang dahnghehna tur a buaipui thut tih minister Dr Vanlalthlana chuan a sawi.
Thawhtannia ZPM office-a inkhawmah Education minister Dr Vanlalthlana hian sawrkar hmasain adhoc school-te sawrkar school-a a lo hlankai chungchang a sawi a. Ni 22.9.2023 khan adhoc school-te sawrkar school-a hlankai theihna tur dan siamin dan tlawhchhan tur awm miah lo thil – DA&RP kaltlang lo, Finance department hriatpuina lehkha hmuh tur awm lo, Law & Judicial department pawmpuina hmuh tur awm lo a ni tih a sawi.
Provisional adhoc school-a an lo puan ve tawp kha dan engmah behchhan nei lo a nih avangin kutlawnga tui dawh tum ang vel; tui um pawpa tui thun tum ang vel a nih avangin a dawhthleng tur a awm lo hrim hrim a, tunhnai kum hnih leh a chanve chhung anmahni a tihbuai phah ta tih a sawi.
“Adhoc school-te provincialize a nih dawnin, criteria /tehna tur chiang taka tarlan a ni a. Higher secondary school tan kum 4 chhung chawhrualin pass pass percentage 80 aia tlem lo an hmu tur a ni. Khawpuiah zirlai 80 leh hmun dangah zirlai 40 an nei tur tih a ni a. High school tan zirlai 80 neih ngei ngei a ngai a, middle school ten zirlai 100 an neih a ngai,” a ti.
Sawrkar hmasa khan thuchhuah a siam atanga ni 5 hnu, 27.9.2023 ah hemi kalh chiah hian Council of Minister thukhawm chuan school thahnem tak sawrkar school-ah a hlangkai tih a sawi a. Dan an siam anga kai thei chu, school 180 atang hian 40 vel chauh an ni tih a sawi. Ni 29.9.2023 khan thuchhuah siamin an nemnghet nghal a. Hemi rual chiah hian provisional adhoc school-a hlankaina thu an tichhuak bawk tih a sawi a ni.
“Heng zawng zawng, provincialised thuchhuah hi thupek lapawchini a ni. A taka chantir turin dawhthleng a nei loa, Council of Minister thukhawm chuan cancel loh chu tih theih dang kan nei lo a ni,” Education minister hian a ti.
Hetiang a nih tak nuaih avang hian, DP&AR minister chairman-na hnuaiah Study Team din a ni a, minister pahnih, MLA pakhat leh Education consultant bakah secretary chin pawh 4 awmin, grant -in- aid rules tha buaipui a ni a, nasa taka buaipui a nih hnuah tuna school 51 hi provincialised an ni ta hram tih a sawi. Council of Minister meeting-ah pawh tum 5 sawiho a ni hial tih sawiin, “Sawrkar hnathawk hlawh pawh pe mumal thei lo khan zirtirtu 1300 chuang dahnghehna tur vawi lehkhatah an buaipui thut mai kha a mak a, la sawrkar zel se chuan an buai ngat ngat khawp ang,” a ti.
MNF sawrkarin a thuchhuah kalhin school 180 sawrkar hnuaiah a dah – Dr Vanlalthlana
