Durtlang leh Sihphir inkar kawng tih zauh leh siamthat mek chu Inrinni khan MNF Thalai chuan hnathawh an enfiah.
MNF Thalai Hqrs. thuchhuak chuan, Central Road Infrastructure Fund nuai 4657 hmuh hmanga siam, km 10.25 a thui niin, kawngpui bik hi nuai 3553 hmanga siam a ni. Border Roads Organisation enkawl he kawngpui hi awitlana awm, a zim avangin lirtheiin inpelh a hlauhawm a, harsatna an tawh nasat thin avangin khatihlaia bialtu MLA, chief minister ni bawk Pu Zoramthanga’n nasa taka hma a lakna azarah Ministry of Defence-in NoC a pe a, kawngpui zim tak chu a lo zau ta tih a sawi a ni.
Tuna kawngpui zauh zawng hi metre 8, lirthei chil tur chin metre 6 a ni a. Kawngpui tha a nih theihnana tul hrang hrang – retaining wall, hume pipe, RCC slab, culvert, pucca side drain adt. pawh a tulna laiah siam vek a ni a, hna zaa 40 zawh tawh a ni tih sawi a ni.
‘Hetianga kawngpui lian tha, kham kara MNF sawrkar Pu Zoramthanga kaihhruaiin a lo ruahman hi ropui kan ti a, Mizoram dung leh vanga kawngpui lian leh tha tam tak siam zawh a ni tawh leh siam mek zel tam tak la awm hi MNF sawrkar nachang hriat vang a ni a, kan lawm hle,’ a ti.
MNF Thalai hian Inrinni vek khan sawrkar hmasaa deputy CM Pu Tawnluia hmalaknaa Smart City Ltd sum hmanga siam Chite Veng Football Ground pawh an tlawh tih an sawi a. Chite Veng field hi a tihzauhnan RCC-a a field dung tluan dawhzawm niin, facilities kentel tam tak a nei a, cheng nuai 840 senna project-ah hian phullem phah niin cafetaria pawh siam tel a ni a; kumin April khan zawhfel a ni tawh tih a sawi.
‘Nasa taka field tihzauh a nih avang leh phullem phah a nih avangin Chite Veng mipui an lawm hle a ni tih a takin kan hmu a. Sawrkar hmasa hmasawnna hnathawhte enzui zel kan tum bakah sawrkar thar hmalakna pawh a hmuna kalin kan vil reng dawn a ni,’ MNF Thalai thuchhuah chuan a ti.
MNF Thalai-in hnathawh en
