MNF Thalai-in kawng chhia siam

MNF Thalai chuan Ningani khan Aizawla kawng thenkhat chhe zual lai an siam.
Kawng chhia siama an chhuah hmaa inkhawmah MNF treasurer Lalruatkima chuan kawng chhiat vanga mipui leh lirthei khalhtute thlavang hauh a, kawng siamtha thuai tura sawrkar muthlu kaihthawhna tura Aizawl khawpui hmun lunlaiah kawng chhe siam hnatlang koh a ngai ta chu pawi a tih thu a sawi.
Aizawl khawpui kawng chhia chu MNF sawrkar laia an siam, hun a lokal deuh hnu ah traffic heavy lutuk avangin an kawng siam chu kumtin danin repair a ngai thin a. ZPM sawrkarin kawng siam ve chu sawi loh, mi kawng siamsa pawh thawmtha thei lo kalphung thar an nei chu a vanduaithlak hle tih a sawi a ni.
Chhiah tih pun loh tiamtuten an sawrkar meuh chuan chhiah an ti pung vak vak a. Kawng siamna tur pawh mipuiah petrol/ diesil leina atangin an khawn mek tih MNF hruaitu hian sawiin, “2023 December 8 atangin ZPM sawrkar hian thuneihna a chang a, kan kawng hi fur ruah kan dawn nasat thin avangin working season apiang deuh thaw in thawmthat a ngai kumtin thin. Sawrkar thar chuan working season chhungin vantlang kawng siamthat a ngaihthah avangin kan dinhmun chu hei hi a ni zo ta a ni,” a ti.