Mizoram Olympic Association Executive Committee chu an president, Sports & Youth Services minister Robert Romawia Royte hoin Ninngani khan an thukhawm.
Kumin October 26 atanga November 9 chhunga Goa-a 37th National Games 2023 neih chungchang chu MOA secretary general, CDM nibawk V Lalzawmliana’n report a pe a. Committee chuan Mizoram team enkawltute leh infiammiten theihtawp chhuaha Mizoram record siama result tha an nei chu lawmawm tiin, sports discipline tam zawka Mizoram a tel pha rih lo erawh tan lak ngaihna a ni tih an sawi. Sports association hrang hrang leh infiammite nasa lehzuala tang tura an beisei bakah MoA pawhin nasa zawka tan lak tum nise an ti a. National Games atana sum ngai zawng zawng Mizoram sawrkarin a tum sak vek avangin an lawm a, Mizoram team enkawltute pawhin infiammite sawrkar laka an lawm thu an sawi a ni.
Mizoram hian gold 2, silver 3 la in Mizoramin National Games-a medal a lak that ber tum a la ni.
MOA thukhawm hian kum 2024-a NE Olympic Games Nagaland-a neih tur pawh thlirlawkin sports association-te leh infiammite inbuatsaih tan tura hriattir nise an ti.
MOA-in National Games thlirlet
