Mipui hriselna atana an thawhna kawngah modern medicine chauh rinchhan loin, hnam zia leh ram leilung nena inrem Ayurveda leh AYUSH system chhawmnuna chawikan zel an tum tih Health & Family Welfare minister Lalrinpuii chuan a sawi.
Nilainia Aizawla 11th Ayurveda Day 2026 a hmanpuinaah Health minister chuan, kan nunphung inthlak danglam vangin non communicable disease – zunthlum, thisen sang, cancer leh lung lam natna a hluar tual tual a, heng natna chona kawngah Ayurveda thuken – natna laka inven hmasak, taksa, rilru leh leilung inrem taka nunho theih chu a chhanna pawimawh a ni tih a sawi a. Kumin Ayurveda Day thupui “Hma hun hrisel zawk atan Ayurveda” tih pawh kan tunlai khawvel nen a inmil hle tih a sawi a ni.
Sawrkar laipui leh Mizoram H&FW department chuan mipui hriselna chawikan an ngaipawimawh, tiin, National Ayush Mission kaltlangin Ayush Health and Wellness Centre din zel a ni a, hmun kilkawr zawka awm tan pawh ban phaka Ayush doctor an awm ta chu hriselna kawnga hmasawnna a ni tih a sawi.
“Health care delivery-ah modern medicine chauh rinchhan loin, kan hnam zia leh kan ram leilung nena inrem Ayurveda leh AYUSH system hi theihtawpa chhawmnun leh chawikan zel kan tum tlat a ni,” a ti.
Day hmannaah hian Ayurvedic Pharmacovigilance (damdawi khuahkhirh leh dik taka hmanna) chunchang sawizau a ni a. Minister hian Ayurveda damdawi dik, him leh tha ber chauh mipui hnen a thlen theihnan AYUSH doctor leh health worker-ten mawhphurhna lian tak an nei a, mipui rintlaka kalpui zel a tul tih a sawi. Mizoram chu a mi cheng zat ngaihtuahin damdawi dawr a tam lutuk chu a tha lo tih sawiin, dan an zir chiang a, pharmasist-in damdawi dawr chu an thutchilh ngei ngei tur a ni, tih a nih avangin, pharmasist ruai lo chuan damdawi dawr a neih theih tawh loh tih a sawi a ni.
Mizoram chu ramhmul damdawiah a hausa a, thil thar rinchhan lutuk loa hriselna tluantling kan neih theihnan Ayurveda zirtirna chu nitin nuna sengluh theuh tum turin a sawm tih a sawi bawk.
Modern medicine bakah AYUSH leh Ayurveda chawinun kan tum – Health minister
