Prime Minister Narendra Modi-a chuan Finland President Alexander Stubb-a hnen atanga phone-a biakna dawngin khawvel huap thil leh an ram hnih inkar thil bakah Ukraine-a indona awm mek muanawm taka tihtawp a nih theihna tur leh thil thleng mekte an sawi dun.
An inbiak zawhah Prime Minister Modi-a’n X-ah an inbiakna tar langin, “President Alexander Stubb-a nen tha takin kan inkawm thei a. Finland hi European Union-a kan kawppui hlu tak a ni a. Sumdawnna, technology leh thil daih rei chi kalpui dan tura thawhhiona kan tihchak theih dan turte kan sawi dun a. Ukraine-a indona kal meka muanna a awm theihna tura hmalakna awm mekah kan ngaihdante pawh kan inhrilh a ni,” a ti.
President Stubb-a hian Modi-a hi tun hnaia Washington-a Europe ram hruaitu, US hruaitu leh Ukraine hruaitute inbiaknaa an thil sawihote pawh a hrilh a. Prime minister hian India chuan buaina awm hi muanawm taka chin fel a duh ber tih hrilhin a hma thei ang bera indona hmuna muanna leh inremna a awm theih a duh tih a hrilh bawk.
Ram pahnih hruaitute hian India-Finland inkara thawh dunna kal mekte pawh an sawi dun a, huang zauhva thil pawimawh bika thawhho tam lehzual theih dan turte pawh an sawi a. Sumdawnna, technology leh thil daih rei thei chia inkungkaihna thuk zawk siam tha an ti a. Quantum technology, 6G, artificial intelligence leh cybersecurity-ah te tanho dan zau zawka dap ni se an ti a ni.
President Stubb-a hian Modi-a hnenah hian Finland chuan a rang thei ang bera khawi lam ve ve pawhin an hlawkpui thei tura India-EU Free Trade Agreement siam fel vat tha a tih thu pawh a hrilh a. Kum 2026-a India-in a thlen tur, AI Impact Summit pawh tha a tih zawng a nih thu a sawi bawk.
Prime Minister Modi-a hian President Stubb-a hi a hma thei ang bera India tlawh turin a sawm nghal a. Hruaitu pahnihte hian inbiakpawh renga an ngaimawh leh ngaih pawimawh zawngte pawh inhrilh zel ni se tiin an sawi a ni.
Modi-a leh Finnish president-in Ukraine buaina sawi dun
