Modi-a leh Macron-a ten Ukraine-a indona sawi dun

Modi-a leh Macron-a ten Ukraine-a indona sawi dun
Prime Minister Narendra Modi-a leh French President Emmanuel Macron te chuan Ningani khan Ukraine leh Asia khawthlang rama buaina awm mek tihtawp a nih theih nana an ngaihdante an inhrilh.
Modi-a chuan, “Ka thian tha, President Macron-a nen inkawmna tha tak kan nei thei a. Muanawm taka Ukraine leh West Asia-a buaina tifelna tura kan thlir dante kan inhrilh a ni,” tiin X-ah a tar lang.
“India-France inkungkaihna pawh tihngheta huang zauh zel ni se kan ti bawk,” tiin a sawi zui.
Macron-a pawhin Modi-a thu tar lan hi X-ah vek dah chhuakin, “Prime Minister Narendra Modi-a nen kan inkawm a, Ukraine-a indona kan ngaihdan leh muanna tluantling a awma Ukraine leh Europe-a himna a awm theihna tura thil kalpui dan tur tha nia kan hriatte kan inhrilh a ni,” a ti ve bawk.
“Sumdawnna thilah pawh kan insumdawn tawnna chu tihnghet zel ni se kan ti a, kan thawhhona pawh kawng hrang hrangah huang zauh zel ni se kan ti a, hei hi ram hrang pakhat leh indang ram kan nihna pawimawh tak pawh a ni,” a ti bawk.
February thlaa Paris-a AI Action Summit neih pawh sawi lang telin Macron-a chuan, “Paris-a summit neih kal zelah New Delhi-a kum 2026-a AI Impact Summit neih tur pawh kan sawi dun a. Thawhhona tha zawk a awm zel theihna turin G7-a France-in president a chelh tur inbuatsaihna leh India-in kum 2026-a BRICS president nihna a chelh tur chungchangte pawh kan sawi dun a ni,” a ti.
February khan Modi-a hian ni thum chhung France a tlawh a, Artificial Intelligence (AI), sumdawnna, energy leh nunphung nena inkaihhnawih thil hrang hrangah hun a hmang a. AI Action Summit-ah kaihruaitu zingah telin khawvel ram hruaitu lawk tak tak leh khawvel pum huapa technology CEO-te an tel.
France a tlawh hnu lawkah Foreign Secretary Vikram Misri-a chuan India-France inkungkaihna chuan a tawn san ber lai a tawng thar tih a sawi a, Prime Minister Modi-a leh French President Macron-a te chuan French presidential aircraft-a chuang dunin thil pawimawh tak tak an sawi dun tih a sawi.
Modi-a’n a tlawh tuma thuchhuah intawm an siamah hruaitu pahnihte hian khawvel pumin chona a hmachhawn mekah tanho leh lo hmachhawn tura inbuatsaih a tulzia an tar lang dun a. A bikin technology leh economics-a thanna a awm mek laiin thil tam takah hmachhawn hautak a awm phah mek a, do let tura tan a ngaihzia an tar lang a ni.
Hruaitu pahnihte hian UN Security Council pawh tihchangtlun a tulzia pawh tar langin hemi kaihhnawihah pawh hian thawhho zel tha an tih tih an sawi.
Modi-a’n France a tlawh tum hian science kaihhnawih thil hriatna, zirbingna leh thil thar chin chhuahna kawngah India leh France thawhho tawhna sawi dunin March, 2026-ah New Delhi-a India-France Year of Innovation chu logo tlangzarha hawn ni se an ti bawk.