Lok Sabha speaker Om Birla chu Thawhlehni tlaia Dhaka-a Tarique Rahman-a kaihhruai sorkar thar lak luhnaah telin Prime Minister Narendra Modi-a’n Bangladeshi prime minister thar hi India tlawh tura a sawmna a hlan a, New Delhi-in a thenawm ram hi inthian thatpui lehna turin chak takin hma a la nghal.
Birla hi Maldivian President Mohamed Muizzu, Bhutan Prime Minister Tshering Tobgay leh Pakistan Planning Minister Ahsan Iqbal te leh ram dang hruaitute nen Parliament complex-a Bangladesh Nationalist Party (BNP) sorkar lak luhnaah hian an tel.
Kum 60 mi, prime minister hlui, Khaleda Zia leh president hlui, Ziaur Rahman te fapa, Rahman-a hian pisa a luah rualin politic-a insawh nghet, an rama sumdawngte rinngam leha awm tura bei, an eibar dinhmun hniam tak chawi kan leh telin thil dang tam tak chona a hmachhawn nghal dawn.
Lak luh a nih zawhah Birla hian Rahman hi hmuin Modi-a’n lehkha a kentir, a chhungte nena India tlawh tura a sawmna chu a hlan a ni.
“Dr Zubaida Rahman leh i fanu, Zaima te nena India-a zin tura sawmna pekna remchang a ni a, India chuan lawm takin a lo nghak reng che u a ni,” tiin Modi-a hian lehkhaah hian a ziak.
Modi-a hian a hma khan BNP-in inthlana hnehna an chang leh Rahman-a prime minister ni tura tih a ni chu a lawmpui thu a lo sawi tawh a. “I hnehna chan hi Bangladesh-a mipuiten an rinngamna che leh i kaihhruai an rintawkna lanna a ni a, an ram chu muanawm, thang duang leh ngialnghet taka hruai i tumna an ringngam a ni,” a ti.
Modi-a hian India leh Bangladesh hian chanchin hlui, khawsak phung leh muanna leh than duanna duhna rilru thuk takin an put ve ve-na avangin thuk takin an inkawmngeih tih a sawi bawk.
Birla-a tawiawmtu, Indian Foreign Secretary Vikram Misri-a pawhin Leader of the Opposition, Jamaat-e-Islami chief Shafiqur Rahman-a pawh sorkar lak luh inkhawm zawhah hian a kawm ve bawk a. Rahman-a hi a chanvo chelh tur lawmpuina hlanin ‘Bangladesh chu India-in a thlawp tlat’ tih a hrilh niin Indian high commission chuan social media-ah a tar lang.
Birla-a chuan social media-ah Bangladeshi prime minister nen hian ‘inbiakna tha tak’ an neih thu leh Modi-a’n a sawmna lehkha a thawn pein ‘a hma thei ang bera India tlawh turin a sawm’ tih a tar lang.
Birla-a hian Maldivian President Muizzu, Bhutan Prime Minister Tobgay leh sorkar la luh inkhawma tel ve ram dang hruaitute pawh a kawm nual bawk.
Rahman-a sorkar thara cabinet-ah hian rin loh takin palai thin, Khalilur Rahman a tel ve a, foreign affairs chantir a ni a. Khalilur Rahman hi United Nations-a an ram palai thin a ni a, Muhammad Yunus-a kaihhruai sorkar lailawkah khan National Security Adviser a ni a, Bangladesh-in sumdawnna thila US inremna a siampuia a bultumtu a ni.
Khalilur Rahman-a hi an ramah chuan mi langsar tak niin Yunus-a sorkarah pawh khan an hmatheh ber a ni a. BNP hruaitu, Humayun Kabir chu foreign minister ni ngei tura ngaih a nih karah nih khalhin Kabir-a hi Rahman-a adviser 10 zingah telin minister of state rank pek an ni.
Modi-a’n Bangladeshi PM thar zin turin sawm nghal
