Modi-a’n seat 400 mamawh chhan a sawi

Prime Minister Narendra Modi chuan BJP kaihhruai NDA tena Lok Sabha inthlanah seat 400 kan mamawhna chhan chu Congress ten Kashmir-ah Article 370 an kalpui loh nan leh Ayodhya-a Ram temple-ah ‘Babri lock’ an kalpui loh nan a ni, a ti.
Hei mai bakah hian RJD leader Lalu Prasad chu sawisel bawkin INDIA alliance ten thuneihna an chan chuan SC, ST leh OBC tena reservation an neih te chhuhsakin an ‘vote bank’ Muslim te hnenah an pe ang, a ti bawk.
Madhya Pradesh a Dhar a rally a neihnaah PM Modi chuan Congress te chuan an poll manifesto-ah contract ah minorities te duhsak an ni ang an ti a, chumi awmzia chu opposition party te hian sakhuana behchhanin contract an pe dawn a ni, a ti bawk.
Congress-te chuan sports-ah pawh minority te chu duhsak an ni ang an ti bawk a, chutiang a nih te chuan cricket team thlanah sakhuana behchhanin selection kalpui a ni mai dawn a ti bawk.
PM Modi chuan Congress te chu Babasaheb Ambedkar ngainepah puh bawkin Pandit Nehru aiin constitution siamah a thawh hlawk lo zawk an ti a ti bawk a. “Thudik tak chu Congress chhungkua hian Dr Babasaheb Ambedkar an hua a ni,” a ti bawk.
BJP ten seat 400 an la a nih chuan Constitution an thlak danglam dawn tiin Congress ten an sawi a, Congress te hian fing takin an vote bank chauh an thlurbing a ni, a ti bawk a.
“Ram mipui tena an hriat tur chu BJP kaihhruai NDA te chuan Parliament-ah seat 400 chuang kan nei reng tawh. Chu mi hmang chuan Article 370 kan nuai bo mai a ni,” tiin PM Modi chuan a sawi bawk a.
PM Modi chuan seat 400 a duhna chhan chu Congress ten Article 370 an tharthawh leh loh nan leh Ayodhya a Ram Temple ah ‘Babri lock’ an kalpui loh nan a ni a ti bawk a.
PM Modi chuan ni 14 kalta khan Congress te chu ziak ngeiin India mipui vaibelchhe 140 te hnenah sakhuana behchhanin reservation an kalpui dawn lo tih tiam turin a tih thu a sawi a.
“Ziak ngeiin SC, ST leh OBC te hnena reservation pek an chhuhsak dawn lo tih leh OBC quota te chu chhuhsakin Muslim te hnenah an pe dawn lo tih ziakin min pe turin ka tia, min chhang let der lo,” tiin a sawi bawk.
“Congress te ka zawh duh bawk chu eng vangin nge kum 1847 hnuah ram hi hmun thumah an thendarh le. Ram pum hi Pakistan a siam ni thei a ni a, India chu nuai bo ni thei a ni,” a ti bawk.
BJP ten term thumna an chelh leh a nih chuan Constitution an thlak danglam ang tiin Congress ten an aupui ti bawkin Modi chuan, “Seat 400 chuang kan neihna hmangin SC/ST quota kum 10 dang atan kan pawtsei zawk a, tribal hmeichhia chu a tum khat nan India President-ah kan dah a, women reservation kan kalpui bawk” tiin PM Modi chuan a sawi bawk a.
“Modi chuan seat 400 a ngenna chhan chu Congress ten he rama ram ruak te leh thliarkar te ram dang hnena an pek loh nan, SC/ST/OBC quota te chhuhsaka an vote bank te hnena an pek loh nan a ni,” tiin a sawi bawk.
Lalu Prasad pawh a hming lam si lova sawiselin, “An leader chuan ran chaw (Lalu Prasad a thubuai fodder scam) a ei a, court-in thiamloh chantirin Supreme Court pawhin hrisellohna avanga a chhuah lailawk mek a ni a. Congress te chuan an lamtir mek a ni. Muslim ten reservation an nei ang a ti mai lo reservation tin te Muslim te hnena pek tur a ti zawk hial a. A awmzia ber chu SC, ST leh OBC reservation te chu chhuhsak vekin Muslim te hnenah pek an tum a ni,” tiin PM Modi chuan a sawi bawk.
Congress-te chuan sakhuana behchhana reservation pek duh lo Ambedkar leh Constitution chu hnunglam atangin an bei a ni a ti bawk a. “Congress te chuan Constitution siamah Ambedkar-an tha a thawh tam lo, a tam ber chu Pandit Nehru tihzawk a ni an ti” tia sawi bawkin Ambedkar chu Congress sorkar lovin Bharat Ratna an pe a ti bawk a.
Congress-te chuan an vote bank te chu India a ‘right to live’ nei hmasa ber an ti a, ‘Modi a dam chhung chuan pseudo-secularism fake hmanga India identity nuaibo tumna hi a remti dawn lo’ a ti bawk.
Congress te chuan kum 50 chhung Gareebi Hatao an aupui tawh laiin miretheite hnena facility kan pek mek chuan a tithinur em em a ni, tiin Modi chuan a sawi bawk a.
“Congress leader te chuan free ration leh free medical treatment scheme te chu kan titawp ang an ti a ni,” ti bawkin Congress te hian legacy leh faith lama kan hnathawh tinte chu an dodal vek, tiin PM Modi chuan a ti bawk.