Prime minister Narendra Modi chuan US president 47-na atana thlan tlin Republican Donald Trump nen an inbiak thu sawiin, a lawmpui thu a hrilh bakah ram pahnih inlaichinna nghet zawk neih a beisei thu a hrilh tih a sawi.
An inbiak thu a sawi hnu hian Modi chuan social media platform pakhatah Trump nen chuan thian tha tak an nih thu a sawi a, hnehna ropui tak a chan avanga a lawmpui thu a hrilh tih sawiin, technology, defence, energy, space leh kawng dang tam takah India leh US inlaichinna tha zawk neih belh a, thawhhona nghet zawk an neih zel a beisei thu a sawi bawk.
Donald Trump-a’n white house a luah tur chu India tan chanchin ngaihnawm tak a nih thu sawiin, Trump chuan a campaign lai pawhin India leh US inlaichinna tha zawk siam tura hma a lak tur thu a sawi nasat avangin tiphurtu a nih thu Modi chuan a sawi.
Amaherawhchu, kawng tam takah erawh India leh US chuan thu inhmuhtawn lohna an neih ve tho thu Modi chuan sawiin, hengah te hian fimkhur tak leh inlaichinna tichhe lo zawnga hmalak chhoh theih ngei New Delhi chuan a tum tur thu a sawi bawk.
Modi-a’n US nena thawhdunna tha zawk neih beisei
