Modi sawrkar kan dem – ZPM
Manipur buainaa BJP sawrkar Prime minister Modi kaihhruai a ngawi tlat chu an dem tih ZPM party chuan an sawi.
ZPM Political Affairs Committee chuan resolution siamin, Manipur state-ah politics buaina nasa tak chhuak a, nunna tam takin tuarin, biak in leh chenna in tam tak hal a nih tawh lai a, Central BJP sawrkar PM Modi kaihhruai a ngawi tlat chu a dem takzet tih a sawi. A bikin Zohnahthlak hmeichhe pahnih ruaka hruaikual a, sawisaa tinnawmnah lai video thla hnih chuang hnua a rawn langchhuak chu thinrim thlak a ti a. Vawiin thlenga thil tisualtute hrem an la ni lo chu Manipur CM N Biren Singh sawrkar rintlak loh zia a tichiang hlea a hriat thu a sawi.
MLA inthlan hun thla 5 a la awm lai leh, ECI-in inthlan a puan hmaa ZPM hotuten an party candidate an rem fel thei chu lawmawm a tih thu sawiin, lungrual tak leh chak taka thawhho an tum tih a sawi.
An party candidate-ten corruption laka fihlim an intiam a, thupui bera an neih thei chu a chhuangin, mipui zarah hlenchhuah a nih theihna’n mipui tihchakna leh tanpuina a dil tih a sawi.
Hmun hrang hrangah ZPM Unit, Zonu leh Thalaiten inhlawhfaa sum tuak a, candidate-te senso phuhrukna’n an hlan thin hi zahawm a tih thu sawiin, ‘Politics khelh dan thianghlim, kalphung thar diktak a lo lang taah kan ngai. Heng avang hian, candidate senso titam zawnga sum beisei lo turin block, unit leh pawl hrang hrangte kan ngen a ni,’ a ti.
Modi sawrkar kan dem – ZPM
