Prime minister Narendra Modi-a’n a thusawinaah ‘India’ tih aia ‘Hindustan’ tih a hmang fo chu Hindu nationalist nia ngaih theihna a awm avangin Parliament House-ah pawh a lo chhanglet ve fo thin tih Mizoram MP K Vanlalvena chuan a sawi.
Youth Services Department leh Mizo Zirlai Pawl buatsaih “Youth 20 Mizoram, Meet on Nationalism, Patriotism & Development” chu Thawhlehni khan Lungleiah hman a ni a. Zirlai kalkhawmte hmaah he hun hmanpuitu Rajya Sabha MP K Vanlalvena chuan, PM Modi chu Indian nationalist nge Hindu nationalist a nih tih a ngaihtuah fo tih sawiin, “A thusawi tam takah India tih aiah Hindustan tih a hmang thin a. Kei chuan ‘Hindustan rama min siam in tum chuan kan tel ve thei dawn lo’ tiin ka lo react ve thin,” a ti.
Mizote hi tu thuhnuaiah mah awm loa, mahnia ro inrel a, mahni kea din duh tlatna thinlung hi Mizo nationalism hrilhfiahnaah a ngai tih a sawi a. “Engtik ni ah emaw chuan ram khat niin kan la awmkhawm anga, eng hmingpu in nge kan la dinchhuah dawn tih erawh chunglam thu thu a ni. Kan insuihkhawma, rorelna pakhat hnuaiah mahnia ro inrela kan awm hi ka beisei tlat a ni,” a ti.
He hunah hian MZP adviser Lalhruaitluanga Chawngte chuan ram hmangaihna awmzia leh hmasawnna neih dan a sawi bawk.
Modi thusawi danin MP ngeng a chhun
