Mizoram State Project Monitoring Committee (MSPMC) chuan an vice chairman R Lal Rinawma hoin Lengpui Airport cheithat hna thawh mek an tlawh a, hmalakna an enfiah.
Lengpui Airport tihchangtlun hna thawh kal mek hi MSPMC hian tun tum hi an vawi li tlawhna a ni a. Hengte atanga an thil hmuh leh siamthat ngai nia hriat hi MSPMC general body meeting-a an sawiho hnuah rawtna engemawzat chu a mawhphurtu department hnenah an lo thlen tawh a. PWD, PHE, P&E leh GAD Aviation Wing nen kumin April 16 leh 18 khan an sawiho tawh bakah contractor pahnih – Zoramchhana leh KR Construction koin, tha taka hna a kal zel theih dan tur an sawipui a ni.
Tun dinhmunah hnathawh mekte a kal tha thawkhatin an hria a. Lengpui Airport tihchangtlun hna hi ruahman ang taka a puitlin ngei theihnan a tul anga vil zui zel an tum tih MSPMC hian an sawi a ni.
Mizoram State Project Monitoring Committee Team hian steel arch (semi through bridge) lei dawh mek, NH44-A a Tlawng lui kanna tur an tlawh bawk a. He lei hi Ministry of Road Transport & Highways project a ni a. EPC mode-a thawh niin, contractor chu Poddar Infratech Pvt. Ltd. New Delhi a ni. A sei zawng hi metre 545.300 niin, senso tur ruahman hi cheng vaibelchhe 36.99 a ni.
Lei dawhna hmanraw hrang hrang hi testing laboratory-a enfiah hnuah a tling chauh hman thin a nih thu MSPMC Team hi hrilh an ni a. Hnathawh tawh chin hi MSPMC chuan tha thawkhatin a hria a, he hna hi December 2024-a zawh theih beisei a ni.
Monitoring Committee-in a tum 4-na atan Lengpui Airport endik
