Hun pekbelh minute nga chhunga Warren Bondo leh Lorenzo Colombo-te goal khat ve ve tihluh hmangin team tenau Monza chuan an mikhual palian lakah hnehna lian an chang a, Serie A kawtkaia an season hnihna leka tum sarih ngawt European champion ni tawh team an hneh thei kha Monza tan chuan sawi hat tham a tling ang!
Mualneitu team khan hun tawp dawn an hmangthiam a, an goal hmasa pahnih pawh half time dawna an sualchhuah ve ve niin, minute 45-ah Matteo Pessina chuan penalty atangin hmahruaina goal a chhuihlut a, hun pekbelh minute ruknaa Dany Mota goal khat thawh ve leh nen half time-ah Monza-in sihnih faiin hma an hruai phawt.
Milan buaina belhchhah turin second half tir lam minute 52-ah Luka Jovic hnawhchhuah a ni a, mahse, pakhata an kimlohna hi Stefano Pioli team-in an tuar lo mai ni loin tan petu a ni zawk emaw tih turin Olivier Giroud leh Christian Pulisic-te goal hmangin an siphurh an sut zo a, an chhuahvahna lam atanga point khat hlawhchhuak tur ang takin San Siro club an lang hman!
Tarlan tak angin, hun pekbelh hmang thiam Monza tan Bondo leh Colombo an inlar a, an club chanchina a vawikhatna atan Serie A kawtkai ngei maiah Milan an hneh.
Pathianni zanah club tenau hneh loin mualpho mah se Pioli team-in khelh 25-a point 52 hum chungin table-ah pathumna an luah chhunzawm thei a, pahnihna Juventus lakah point hniha hniamin, hmahruaitu Inter Milan nena an inthlauhna erawh point 11 lai a ni tawh thung.
Inter hian Zirtawpni khan 4-0 ngawtin Salernitana an sawp a; Inrinniah an elpui lianber Juventus chuan Verona khelmualah point hnih hloh thenin 2-2 draw an hlawhchhuak thei hram a, tunah title race-a tlema la hnaivai ve leh deuh dang AC Milan an han chak lo ve leh a, an hnuaia thu pahnih aia game khata la khel tlem zawk Internazionale tan hmabak a eng zual deuh deuh.
Pathianni Serie A inkhel dangah Rome khaw team pahnih boruak hap a inchen lo a; Roma lamin Frosinone muala 3-0 hnehna an lawm laiin Lazio erawh an mikhual Bologna lakah 2-1-in an tlawm thung.
AC Milan lamah kirleh ila, Ningani hian Europa League knockout play-off first leg-a sithum faia an hneh tawh Rennes laka an hmabak hlenchhuak turin France ramah second leg an khel dawn a, si phur nghek chunga an tlawm a nih ngawt loh chuan last 16 lut tura ngaih niin, an tum leh theih tur zingah English club pathum – Liverpool, West Ham United leh Brighton an tel.
Monza 4-2 AC Milan
