Morgan Wallen album ‘One Thing at a Time’ chu Billboard 200 (albums) chart-ah a No.1 a, he chart-a kar 16 a No.1-na a ni ta a, 2011-2012-a Adele album ’21’ kar 24 chhung a No.1 theih hnua he chart-a No.1 ni rei leh theih ber a la ni. Hetihrual hian Ed Sheeran album thar ‘Autumn Variations’ pawh chart top 5-ah a debut e.
Billboard 200 chart hi kar khat chhunga US-a album hralh tam dan atanga teha chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh alnbum-a hla mal hralhna atanga album tlukpui te belhkhawm thin a ni.
Morgan Wallen ‘One Thing at a Time’ hi kar khat chhungin 74,500 an hralh leh a, chung zingah 71,500 chu streaming atanga album tlukpui (on-demand official stream maktaduai 97.56) niin, album tak tak hralh chu 2,000 niin, album-a hla mal hralhna atangin 1,000 tlukpui a tling thei bawk a, hei hi a chart-a a No.1 pui leh ta a, he chart-ah hian a zawn ni kher lovin kar 16 a No.1 tling ta a ni.
One Thing at a Time album hi March thla laihawl chart-ah khan No.1-ah a debut a, chuta tang chuan kar 12 chhung a zawnin a No.1 zui a, kar hnih chhung a tawlh hnuah a kar thumnaah No.1-ah kai lehin, a zawnin kar thum a No.1 leh a, tunah an tlangzarh atanga kar 31-naah No.1-ah a rawn kai leh ta a ni. He album hi an tlangzarh atangin chart top 4-ah a la lang ngar ngar a ni.
Rod Wave ‘Nostalgia’ chu 71,000 hralh lehin kar hnih a No.1 hnuah No.2-ah a tawlh ta a, chart No.1 hlui bawk Olivia Rodrigo ‘Guts’ chu 67,000 hralh lehin No.2 atangin No.3-ah a tawlh ve ta bawk.
Ed Sheeran album thar ‘Autumn Variations’ chu 62,000 hralhin No.4-ah a debut a, hei hi a album he chart-a top 10 kai thei pasarihna a ni a, a album pasarih te hi chart top five-ah a la debut thei vek a ni. ‘Autumn Variations’ hi 46,500 chu album tak tak hralhna niin, streaming atangin 15,000 (on-demand official stream maktaduai 18.78) a tling a, album-a hla mal hralhna chu 500 a tling thei bawk.
Chart No.1 hlui Zach Bryan self titled album ‘Zach Bryan’ chu 59,000 hralh lehin No.5-ah bawk a la awm a, chart No.1 hlui bawk SZA ‘SOS’ chu 48,000 hralh lehin No.6-ah bawk a la awm a, chart No.1 hlui Travis Scott ‘Utopia’ chu 46,000 hralh lehin No.7 a la ni a, chart No.1 hlui bawk Taylor Swift ‘Midnights’ chu 43,000 hralh lehin No.10 atangin No.8 a kai thar leh ta bawk.
Kar kalta chart No.2 Doja Cat ‘Scarlet’ chu 41,000 hralh lehin No.2 atangin No.9-ah a tawlh a, Peso Pluma ‘Genesis’ chu 41,000 tling lo deuh hralh lehin No.9 atangin No.10-ah a tawlh ta bawk.
Morgan Wallen ‘One Thing at a Time’ a No.1 leh ta
