Moscow-ah Jaishankar-a
leh Putin-a inkawm
Indian Foreign Minister S Jaishankar-a chuan Ningani khan Moscow-ah Russian President Vladimir Putin-a kawmin hun rei tak ata tawh insumdawn tawn ram pahnihte hian Russian tuialhthei a lei avanga US-in India hrek a tum mek laiin an inpawhna thilte an sawi dun.
Jaishankar-a hian a hmain Russian Foreign Minister Sergey Lavrov-a pawh a hmu a. A hnua thuthar lakhawmtute an kawmnaah US-in tariff tihsansak a tumna chungchang an zawhna chu American-ten an dodalna pakhat a nih thu a sawi.
Modi-a sorkar hian Russia nena an inkar tinghet zelin President Donald Trump-a’n chhiah sang tak tak laksak a tum hnua a thenawm, China nena an inkar pawh a titha thar mek a, sumdawnna leh ram dang kawmngeih kawngah tan a la mek.
Russia a kal hma hian Jaishankar-a hian Chinese Foreign Minister Wang Yi chu New Delhi-ah a lo kawm tawh bawk.
US hian Indian bungrua a lak luhah tariff 25% a laksak mek a, tun thla tawp atang hian Russia atanga tuialhthei a lei avanga 25%-a tihsan belh a tumna chu a hmang tan dawn bawk.
India hi China dawta Russia atanga tuialhthei lei tam ber a ni a, US hian China lakah hetiang hremna hi a la kalpui ve lo thung.
Hemi chungchangah hian US treasury secretary chuan India hi China nen an inang lo tih a sawi a, New Delhi chuan Russia-in Ukraine a rûn hnuah chauh Moscow a dawr tam zual niin a sawi a, indonaa sum hman tur a neih theihna pawimawh tak niin a sawi a ni.
Jaishankar-a pawhin Lavrov-a nena thuthar lakhawmtute an kawmnaah zawhna a chhan dan a ni a, “Keini hi American-ten khawvela tuialhtheia harsatna a awm lohna tura khawvel puma inleisak tawnna kawnga mi a fak thin ram kan ni a, chutah chuan Russia atanga kan lei pawh a tel a. US atang pawhin kan la lut a, kan la lut tam telh telh bawk a. Chu chu thil awm dan a ni a, chanchinbuten in ngaihdan dan dan ang a ni mai,” a ti.
Prime Minister Narendra Modi-a chuan tun hnaiah Putin-a hi a fak a, Delhi hian Beijing a pawh thar leh bawk a, hei hi India-in US-in tariff hmanga nasa taka a hrek atanga a hawisan hret hretna tilangtua ngaih a ni.
President Trump-a nena Ukraine-a indona tihtawp nana an inbiak hnu lawka Putin-a’n a biaknaah pawh Modi-a chuan Russian hruaitu hi ‘thian tha’ tiin a sawi a. Inbiakpawh reng tha an ti a, India chuan Ukraine-a buaina awm chu muanawm taka chin fel tha a ti ber tih a hrilh a ni.
Moscow-ah Jaishankar-a leh Putin-a inkawm
