MP candidate atan milar intirhna ngawt chi a ni loa, hna thawk thei tur intirh chhuahna hmun zawk a ni tih ZPM hruaitu, minister K Sapdanga chuan a sawi.
Lok Sabha inthlanpui atana Tuirial bial huamchhunga a campaign-naah K Sapdanga chuan, MP thlan turah kan ram dinhmun leh hun lo awm zel tura kan tu leh fate hmakhua thlir chunga vote thlak a pawimawh tih a sawi a. MP chu state sawrkar leh central sawrkar inkara palai hna thawk tur a nih avangin uluk takin candidate thlan chungchangah ngaihtuahna an seng a, mi tha tak candidate neia an inhriat thu a sawi.
ZPM candidate chu Vai rama seilian a nih bakah tawng chungchangah pawh harsatna nei lo a ni, tiin, “Candidate tha leh mawng zang tak, social worker tha tak leh project haichhuak zung zung thei tur a ni. Delhi khawpuia tlangnel em em tur, a thil tihna apianga rintlak leh rinngam mi a ni a, kum lamah pawh pavalai chak tha rual, engkima duhthusam kan nei a ni ber,” K Sapdanga hian a ti.
MP hi hna thawk thei tur intirhna hmun a ni – K Sapdanga
