Central-a BJP leh a thurualpuite sawrkarin ro a rel danah Mizo mipui thlawp an hlawh viau an rin laiin, chutiang lam chu a tam zawkin an hawi lo hle a, kan inngaihtuah chian a ngai tih Congress vice president Lalnunmawia Chuaungo chuan a sawi.
Zirtawpnia Congress Bhavan-a inkhawmah Congress vice president chuan BJP-in central-ah ro an rel dan kan hria a, BJP paihthla thei party chu INDIA Alliance, Congress party kaihhruai a ni, tiin, “Mizo mipui hian Congress min thlawp turah kan lo ngai a. Chu chu kohhran hruaitu leh mi tamtakin kan hnenah pawh an sawi a ni. Candidate tha tak kan nei a, kher neuh neuh pawh dawl tak a ni chungin, mipuiin chutiang lam chu an lo hawi lo hle a lo ni a. Mizo mipui hian kan ngaihtuah chian a ngai hle a ni,” a ti.
Congress party chu Mizorama remna leh muanna a awm theih nana thawhhlawk ber, a mimal takin Pu Lal Thanhawla chu a thawhhlawk ber nia a hriat thu Lalnunmawia Chuaungo hian a sawi. “Rambuai hrehawm zia kha hre lo tamtak an awm tawh a, kan rethei em em thin. Tunah chuan kan lo zalen ta a, remna leh muanna a lo thleng ta. Congress party zarah remna leh muanna a thleng a ni,” a ti.
Congress party chu ram rorelna chelh leh tura an inbeisei rualin, enge rorelna fawng a chelh a tulna, tih an inzawh fo a ngai tih a sawi a. Ram mipui leh ram hmasawmna dah pawimawh hmasak ber tur a ni, tiin, chu chuan kan society leh chhungkuaah hmasawnna a thlen dawn tih a sawi a ni.
MP thlanah mipuiin min thlawp turah kan ngai a… – Lalnunmawia Chuaungo
