Ram leh hnam ngaihtuah chungin, MP thusawi thei ngawt ni lo, MP thiltithei thlan chhuah a ngai tih BJP Mizoram president Vanlalhmuaka chuan a sawi.
Lok Sabha MP thlan tura Thawhtannia Aizawla street campaign an neihnaah BJP State president chuan Mizoramin mahnia thawhchhuah leh intodelh theihna kan la neih loh avangin central puihna kan mamawh a, MP inthlanah BJP MP kan neih a tul hle tih a sawi. BJP MP kan thlang lo a nih a, state sawrkarin sum leh paia harsatna a tawk a nih pawhin sawrkar lai mawhpuh theih a ni lo a, a mawh chu a thlangtu mipui kan ni dawn tih a sawi a ni.
“Central-a BJP hotuten Mizoramin kawng hrang hranga hma kan sawnna tur manifesto duhsak taka min duansak hi, BJP telna sawrkarah emaw BJP MP kan neih chuan tihhlawhtlin a ni thei dawn a, chumi ah chuan kuthnathawktute tana hamthatna tur, sawrkar mek ten thlaithar leina tura an dah aia tam fe a awm,” a ti.
State sawrkarah sawrkar tha tak kan thlantlin takin hna an thawh theihnan anmahni puitu tur leh Mizoram mamawh central atanga sawichhuah pui tur, central thisen zawmpui kan mamawh tih hriain Lok Sabha inthlanah an party candidate vote sak turin Vanlalhmuaka hian a ngen tih a sawi a. “Kan ram kan hnam ngaihtuah chunga MP thusawi thei ringawt nilo, MP thil ti thei nei turin BJP MP kan mamawh a. BJP kan duhlo emaw kan zawm duh lo a nih chuan central khuan min thlir reng avangin, state sawrkar hruaitute zin hian sapui an rawn hawn ngai dawn lo a, tawngkam tha leh thlum bak hawn tur an nei dawn lo,” a ti.
MP thusawi thei ngawt ni lo, MP thiltithei a ngai – Vanlalhmuaka
