Congress party chuan petrol leh diesel-a Mizoram sawrkarin cess a lak mek chu titawp rih turin an ngen a. June thla chhunga an ngenna hi tih hlawhtlin a nih loh chuan hma lak chhunzawm zel an tum tih an sawi.
MPCC Action Committee chuan Nilaini khan chief minister hnenah ziakin ngenna an thlen a. Khawvel hmun hrang hrangah oil man a pun chhoh zel avangin India ram leh Mizoramah pawh namen loin petrol leh diesel man a pung a. Mizoramah bik petrol leh diesel man a san ber tum a ni hial tih a sawi.
Heti taka POL man a pun tak avang hian mipui leh lirtheia eizawng tam takin harsatna an tawk tih sawiin, POL man pung vanga mipuiin harsatna lian zawk kan tawh zel lohna turin Mizoram sawrkarin September 2024 atanga petrol leh diesel atanga Social Infrastructure & Services Cess Rs.2 per litre leh Road Maintenance cess Rs.2 per litre, a vaiin litre khata cess Rs.4 zel a lak chu mipui phurrit chhawk zangkhaina atan titawp rih turin an ngen tih a sawi a ni.
Mizoram sawrkar hian VAT atangin petrol leh diesel-ah chhiah tam tawk tak a lak sa reng tho avangin POL man tipung lehzual tura litre khat zela sawrkarin cess Rs.4 a lak belh mek chu mipui zangkhai zawkna atana sut turin MPCC chuan Mizoram sawrkar a ngen tih a sawi.
Mizoram sawrkarin petrol leh diesel atanga litre khat zela cess Rs.4 a lak chu June 2026 ralhma ngeia sut turin an ngen tih sawiin, ‘Kan hun tiam chhunga POL atanga cess lak hi tihtawp a nih loh chuan mipui thlavang hauh turin hma kan la chhunzawm dawn a ni,’ a ti.
MPCC-in POL-a cess lak mek titawp turin sawrkar a ngen
