September ni 8, Thawhlehni khan StarCement MPL 13 round 5-na khelh a ni a, table-ah pahnihnaa awm mek Mizoram Police FC (MPFC) chuan MLS FC, Lawngtlai lakah awlsam takin hnehna an chang a, hma lam an pan. MFC rual hian Saikhamakawn FC pawhin hnehna an chang a, hma lam an pan ve bawk.
MPFC 3-0 MLS FC
Khelh li atanga point 8 hmua pahnihna luah mektu Mizoram Police FC hian khelh li atanga point li hmua parukna luah mektu MLS FC an hmachhawn a. Lawngtlai club lakah awlsam taka hnehna changin point thum an hmuh belh.
MLS FC lakah chak ngei tuma tan khawh MPFC hian bul an tan tha thawkhat viau a, goal pawh an thun har lo. Darkar chanve an khelh tlin hma hret minute 27-naah captain Lalfakzuala chuan hmahruaina goal a thun. Hma hruaina goal an thun hnuin MPFC hi an inringtawk lehzual a, phurna namen lo tak nen an khingpuite an hmachhawn zui. Chawlhlawk hmain khel tha zui thawkhat viau mah se goal erawh an thun belh thei bik lova, 1-0 a hmahruai chungin chawlhlawk an hmang.
Chawlhlawk hnu lamah Mizoram Police FC an khel tha chhunzawm a, goal an thun belh leh thuai. MLS FC in an si phurh sut tuma tan an khawh laiin an chesual a, penalty an chawi. Penalty hi MPFC tan veteran striker Malsawmfela chuan harsatna tawk lovin a pet goal a, minute 51-naah an goal hnihna thunin an hmahruaina a tizau leh zual.
2-0 in hnufual tawh mah se MLS FC an insiamtha thei tak tak lova, goal thun tur khawpin an khingpui tlarhnung an paltlang thei lo. Goal thun tumin tan khawh nasa viau mah se goal dang an chhuah belh leh ta cheu zawk, MPFC tan hian Lalbiaktluanga chuan minute 70-naah an goal thumna a thun a, an chakna a nemnghet. Biaktluanga goal thun hnuin goal dang a luh belh thei tawh lova, Mizoram Police FC chuan 3-0 in hnehna an chang zui ta a ni.
3-0 a MLS FC sawptu Mizoram Police FC hian khelh nga atangin point 12 an hmu a, hmahruaitu Aizawl FC point hmu zat an nihrual. Aizawl FC hian MPFC aiin an khel tlem hret thung a, vawiinah an chak a nih chuan point thumin an sang fal zui leh ang. MPFC in hnehna changa hma lam an pan laiin MLS FC erawh chuan khelh nga atanga point 4 hmuin parukna atangin pasarihnaah an tlahniam ve thung.
Saikhamakawn FC an chak
MPL 13, Round 5 inkhel hmasa berah Saikhamakawn FC chuan 2-0 in an khingpui Kanan FC an hneh a, table-ah pen khatin hma lam an pan. Saikhamakawn FC in hma lam an pan laiin Kanan FC erawh an talbuai zui zel thung a, season tharah la tlawm vekin table mawngphah an luah nghet deuh deuh zel.
Table hnuai lama awm pahnih Saikhamakawn FC leh Kanan FC te hi an inbeitawk viau a, goal pawh a lut lawk thei lo. Goal lut a awm theih loh reng hnuin chawlhlawk dawn hnaih minute 45+3-ah Saikhamakawn FC tan Vanlalthanga chuan hmahruaina goal a thun. VL Thanga goal hmang hian 1-0 a hmahruai chungin chawlhlawk an hmang.
Chawlhlawk hnu lamah pawh goal a lut har leh viau a, goal lut turin hun pek belh nghah thlen a ngai. 1-0 a hmahruai tawh Saikhamakawn FC tan hian Malsawmdangkima (Duata) chuan minute 90+4-ah an goal hnihna a thun a, an chakna a nemnghet. Kanan FC lakah point thum an hmuh hmangin paruknaah an inhlangkai zui nghal.
MPFC in hma lam an pan
