Mizoram Public Service Commission (MPSC) hna lak hrang hrangah thil fel lo a awm ngei nia a hriat vanga bang tura an nawr mek MPSC chairman pisa kai tur chu Thawhtanni khan Mizo Zirlai Pawl chuan an dang a. A ban hma chu dan an tum tih an sawi.MZP hian hna lak kaihhnawiha thil fel lo awm nia an hriatah mawhphurhna laa bang turin MPSC chairman hi a lo ngen tawh a. An ngenna in awmzia a neih loh avangin Thawhtanni zing dar 8 atangin chairman ban phutin MPSC office kawtah an pungkhawm a. MPSC hnathawkte pisa kai tur dan tan an ni.
MPSC chairman hi pisa a kai loa, thawktu thenkhat erawh, MZP hian chairman office kai tur chauh dang tur nia an hriat avangin pisa kai an tum a, MZP hian an lo dang a, an haw leh a ni.
Chawhnu lama MZP hruaitute thukhawm chuan, MPSC chairman hi a ban hma chuan MPSC pisa kai tur hi dan chhunzawm zel nise, a ti a. An hmalakna in awmzia a neih loh zel chuan lian zawka hma lak an tum tih an sawi.
MZP hian Combined Competitive Exam-a exam endik danah thil fel lo awm nia hria in hma an la tan a, hemi hnu hian junior grade of Mizoram Forest Service (Asst. Conservator of Forest) mi pathum lak turah exam neih vek tawh chu MPSC hian answer papers an endik (evaluate) loh tur thu 2024 April 10 khan thuchhuah an siam tih an sawi a. Environment Forest & Climate Change department service rules leh advertisement anga exam neih tawh chu edik ngei turin MPSC a phut nghal tih a sawi a ni.
MPSC chairman ban phutin MZP-in pisa kai tur an dang
