MPSC hna lak dan chhui zui
turin MZP-in sawrkar a ngen
Tunhnaia Mizoram Public Service Commission (MPSC) hnuaia hna lak dan an chhuizuina leh hna zawng mekte atanga thu an dawn dan atangin, thil fel lo awm ngeia an hriat avangin chhuichiang a, a tul anga hma la turin sawrkar an ngen tih Mizo Zirlai Pawl chuan an sawi.
MZP Gen. Hqrs thuchhuah danin, MPSC-in Health & FW department-a thawk tur, entomologist post khat ruaka hna lakah exam hmachhawn turin mi 22 an tling a. Exam petute atangin mi 5 chu endik atan an document thehlut tura tih an ni. Thla 6 ral hnuah mi 3 chu personal interview nei tura hriattir an ni a. Inbuatsaihna a kal mek laiin, interview hun sawn thut a ni. Hna diltu zawng zawng document ennawn turin Screening Board member ruat thar niin, interview tura a tira koh tel loh pakhat – Lalfakzuala Pautu chu koh tel nawlh niin, final result-ah pawh Lalfakzuala Pautu chu lak ni.
Hna lak dan hi zirchian a, chhui a nih hnuah duhsak zawng thun tumna a ni tih hai rual a ni lo tih a sawi a ni.
MPSC-in entomologist hna a lak dan leh veterinary asst. surgeon hna a lak dan chu chhuichiang a, a tul anga hma la turin Mizoram sawrkar a ngen tih MZP hian sawiin, December 20 ralhmaa hmalakna a awm lo a nih chuan, hma lak zel dan tur a ngaihtuah dawn tih a sawi.
‘Hna la tura din MSSSB thiah a nih khan, MPSC thuamchak turin sawrkar kan lo ngen tawh a. MPSC chak leh rintlak zawk, zirlai hna zawng mekten an beisei lai a, MPSC a mualpho reng mai hi zirlai hna zawng mekte tan a a beidawn thlak a. Sawrkar pawh ngaihtuahna thar seng turin kan ngen a ni,’ MZP chuan a ti.
MPSC hna lak dan chhui zui turin MZP-in sawrkar a ngen
