Kumin February 1-a Mizoram Public Service Commission (MPSC) in result a tihchhuah tak Combined Competitive Examinations kalpui danah thil fel tawk lo leh chhuichian ngai thil a awm ngei nia an hriat thu Mizo Zirlai Pawl chuan an sawi.
MZP Gen. Hqrs. chuan, Mizorama hna sang leh zahawm tak tak lak hna, MPSC-in tun thlenga rintlak taka hei leh chen a kalpui chu lawmawm a tiin, thalai hna zawng mekte pawhin an rintawk hle thin laiin, Combined Competitive Examinations kalpui hnuhnung berah thil dik tawkloa hmalakna awm ngeiin an hria a, an ngai thutak hle tih a sawi.
‘Ngunthluk zawka zirchiana MPSC hi thalai hna zawng mekten an rin ngam zel theihna’n a tawp thlengin hma kan la zel dawn a. Tunhnaiah NIT Mizoram assistant registrar leh Aizawl Municipal Corporation hnuaia hna lak hrang hrangah a buaipuituten an laina hnai duhsak zawngte thun an tum avangin hma a la a. MPSC-ah hetiang a lo awm leh hi pawi kan ti takzet a ni,’ a ti.
MPSC hna lak dan chhuichian ngai a awmin kan hria – MZP
