Tunhnaia Mizoram Public Service Commission hna lak dan chhuichiannaah thil fel lo hmuh a awm lo tih chief minister Lalduhoma chuan a sawi.
Thuthar thehdarhtute zawhna chhangin chief minister chuan, MPSC hna lak dana thil dik lo tih a awm nia hriat a nih avanga inquiry laknaah thil fel lo hmuh a awm lo tih hi a sawi. Hemi chunchang chhui tura ruat Pu M Lalmanzuala, IAS (Rtd) chuan, an exam chhanna lehkhaa mark pek an nawhreh tak leh mark pekna tur tak zawka mark an pek chu a khaikhin a, a inmil vek a, mark tihdanglam a awm lo tih a sawi.
“Keimah zawkin answer script-a mark pek, correcting fluid-a an lo chawh reh tawh hnu, tabulator slip ami nen a inmil a ni tih a hriat theih dan kha ka zawt leh a, a ni (inquiry titu) chuan a la hmuh theih (visible/noticeable) vek a ni, a ti a. Hei hi a dik chuan, kan kal lehzel dan turah chuan, kum 10 zet an lo kalpui tawh (answer script-a mark pek leh nawrhreh leh) hi tun hnu ah chuan rintlak a ni lo tih kan hre tawh a. Thil dang ngaihtuah chhuak tawh turin kan ti,” a ti. Hei bak chhuichhuah leh tur awmin an hre thei tawh lo tih a sawi bawk
Mizo Zirlai Pawl chuan MPSC-in MCS Combined Exam chhanna an en dan leh mark pek danah dan dik lo thil tih a awm nia hria in, he thila a mawhphurtu bera man chu bang turin an lo nawr tawh a, sawrkarin chhuichian tura tiin, Mizoram chief secretary hlui leh MPSC chairman hlui M Lalmanzuala, IAS (Rtd) chu ni 7 chhunga chhuichiang turin a ti a, mi hrang hrang a kawm bakah document hrang hrang a enkual hnu in, a ni 7 ni hian sawrkarah report a thehlut a ni.
MPSC hna lakah thil fel lo hmu lo
