MPSC hotu pakhat chet dan
thleng nawn lo turin kan duh – MZP
Mizoram Public Service Commission secretary letter head-a UD&PA hnuaia hna (works) indilpuina a awm chu tha lo an tih thu Mizo Zirlai Pawl chuan sawiin, MPSC zahawmna leh dik taka a kal zel theihnan hetiang thil hi thleng nawn tawh lo se an duh tih an sawi.
MZP Gen. Hqrs thuchhuak chuan, tunhnaiah Mizorama hna latu sang ber Mizoram Public Service Commission (MPSC) a an hotu pakhatin, UD&PA hnuaia hna (works) pakhatah a duhsak zawng hna pek a nih theihnan MPSC letter head hmangin sawipuina lehkha (recommendation) a ziah chu social media-ah a darh tih a sawi a. Hei hi MZP chuan pawi a tiin, hriatthiam har a ti hle tih a sawi.
Mizorama hna latu sang ber MPSC zahawmna humhim zel a nih theihnan leh MPSC-in fair taka hna a lak zel theihnan hetiang thil hi thleng nawn tawh lo se a duh tih MZP hian sawiin, MPSC hnuaia thawktute pawh lo fimkhur zel turin a ngen tih a sawi a ni.
‘MPSC-a thawktute chu dik leh fel taka awm tur leh, pawn lam thilah pawh inhnamhnawih lo tura ngaih leh beisei an ni a. An pisa-ah pawh mimal thila inleng nei lo tur hiala ngaih an ni. Hetiang thil thleng avang hian hnungthak inhiah tawnna pawh awm thei a nih avangin, MZP chuan MPSC-a thawktu zawng zawngte fimkhur zel turin a ngen a ni,’ thuchhuah chuan a ti.
MPSC hotu pakhat chet dan thleng nawn lo turin kan duh – MZP
