MPSC-in thiamchan tumin mite rilru hruaikawi a tum – MZP president

Mizoram Public Service Commission hna lak dan kalphung siamthat phuta hma la mek Mizo Zirlai Pawl chuan, MPSC hian insiamthat tum aiin thiamchan tumin mite rilru hruaikawi dan a dap zel niin an sawi. MPSC hotute chuan MZP thil phut chu tuna an dinhmunah chuan tihhlawhtlin mai theih a ni lo tih an sawi ve thung.
MZP hian hna zawng mekte tana tha zawk tura nia an hriat, MPSC hna lak dan phung siamthat phutin kar kalta khan ni hnih chhung MPSC office kawtah an pungkhawm tawh a. Thawhtanni khan an thil phut na zawka nawr tumin thawktute pisa kai tur an dang a, thawktute hi luh luih an tum nia hria in MZP lamin an lo dang a, police-in MZP hi an hnawtkiang ve thung a, reilote chhung an innawr buai a ni.
MZP hruaitute sawi danin, August 6 khan MPSC chairman hnenah an thilphut hi ziakin an thlen a, August 7 zan dar 11.20 khan Whatsapp hmangin chhanna sei tak an dawng a, an chhanna hi a tuk, Inrinni-ah nasa takin a darh a, MZP Gen. Hqrs. hnenah a copy an pe mai emaw tih chu, hmun tinah a darh a, hna zawng mekte harsatna sutkian tumna lam aiin mipui vantlanga insawifiah tumna leh thiamchan tumnaah an ngai tih an sawi.
August 9 zan dar 11.00 hnulam khan MPSC hian mipuia thiamchanna atan interview tur awm hrang hrang a vawrh darh leh nia sawi bawkin, aspirant-te harsatna sutkian tum aia mipui rilru hruaikawina thuchhuah chu thleng nawn tawh lo se an duh hle tih an sawi a ni.
Thawhtanni hian ‘peaceful protest’ an neih mek laiin, MPSC hotute hian magistrate kaltlangin inbiak an rawn rawt a, MZP chuan MZP OB bakah College SU hruaitute, aspirants, Joint Hnampual hruaitute nen inbiak nise an ti a, magistrate lamin inbiakna hmun atan Sports directorate office an befel tawh a, hetih lai mek hian MPSC hotute leh thawktu dang chu police tha chakna hmangin office-ah luh an tum a, MZP lamin luh phal loin an lo dang thung tih an sawi.
Hemi hnu hian an innawr buai tak thu sawiin, police hotu pakhat tawngkam hman uchuak leh police zinga rim danglam an awm thu pawh MZP hruaitute hian sawiin, “Hetianga police-ten tharum an thawh leh MPSC chairman leh secretary bakah officer leh staff-ten police tha chakna hmanga zirlai, mahni dikna chanvo phut che an pallui hi kan dem takzet a. Inbe tura kan inruahman lai a, MPSC pisa-a luh an tum hi enge tih an tum a, eng rilru nge an put tih kan zawt a ni,” MZP president C Lalremruata chuan a ti.
Hetihlai hian MPSC chuan thawktute pisa kai tur tihbuai an nih avang hian hna lak tur leh kaisanna tur an buaipui lai mek chu tiamchin awm loa sawn hlat bakah boruak awm dan azira inhriattir leh turin an dah tih thuchhuah a siam a. Insawifiahna thu siam bawkin, candidate-te hamthatna, rintlak a nihna leh a zahawmna (credibility) humhim chu thil pawimawh berah MPSC chuan a ngai a. Hna a kalpui dan tur chu candidate pakhat emaw group pakhat emaw tan chauh ni loin, candidate zawng zawng tan thuhmun, felfai leh dan ang taka kal tur a ni tih chu an dinna a ni tih a sawi.
MPSC thawktute pisa kai tur dan chu tihtawp thuai nise a duhawm tih sawiin, schedule duan lawk sa tam tak a tihbuai dawn bakah personal interview kal mek leh hun ruatfel tawh, examination buatsaih, promotion atana Departmental Promotion Committee hun ruat tawh, exam hmachhawp atana inpuahchahna, dilna endik hna, result buaipui leh tul dang a tikhaihlak dawn tih a sawi a ni.
One Time Registration chungchangah, advertisement tih chhuah a nih apiangin dilna famkim lo thehluttute chu eng stage-ah pawh an dilna hnawl theih a ni ang, tih ziahlan zel a ni chung pawhin, candidate tam takin written exam zawh a, document an upload kim loh avanga hnawl an nihin an hrethiam thei lo tih MPSC hotute chuan an sawi.
‘Hei hi pawi kan tiin application ‘initial stage’ a document-te zaa za check thei turin sawrkarah mamawh thlenin July 28 khan post 9 min pek belh a. Hei bakah hian post 26 dang pek belh turin hma lak mek a ni. MPSC mamawh khawl leh thil dang pawh sawrkarin min ngaihtuah sak mek a. Hnathawktu thar lak belh an nih hnuah chuan application a tirah zaa za check theih tawh tura beisei a ni a, hei hian tuna candidate-te harsatna neih ang chi pawh a sutkian rin a ni,’ a ti.
MZP duh dan thlen chu a theih chin chinah tihhlawntlin a niin, MPSC online portal pawh nasa taka tih changtlun zel a ni a. Tuna buaina awm mek ang chi hi chu hun reilote hnuah kiang thuai tura beisei a ni tih an sawi bawk.