MPSC hna lak dan phung siam that phutin tun hnaiah MZP member-te MPSC office kawtah pungkhawmin, innawr buaina te a thleng hial a. Mizoram Public Service Commission-a harsatna awm nia lang sutkian a nih theihnan Mizo Students’ Union pawhin chief minister hnenah rawtna an lo thlen bawk a.
Kan hriat angin hmanni lawkah NEET paper leak chungchangah Cockroach pawl hmalakna avangin union education minister-in banna a theh luh phah tawh a. Tun hnaiah Jharkhand Public Service Commission buatsaih 14th Combined Civil Services Exam chungchangah buaina a thleng mek bawk a. Kum 5 vel kal ta atang khan state hrang hrangah public service commission buaina hi a lo thleng tawh thin a. Kum 10 chhung zet paper zuar chhawng network te pawh a lo awm a ni awm e.
MPSC-in tunhnai kumkhat leh a chanve chhunga tihsual siamthatna (corrigendum) vawi 16 chuang an chhuah avang ringawt pawh hian MPSC hnalak danah felfai tawk lo awm niin a lang, tiin MSU lam chuan chief minister hnenah thu an thlen a. Hei hi a serious hle a ni.
Mizoram Public Service Commission hi dik leh felfai ber tura ngaih a ni a, chutiang a nih laia kum khat leh a chanve chhunga vawi 16 tihdikna an chhuah hman a nih tawh chuan, tihsual hi thla tin deuhthaw an nei tihna a ni a. Vawi hnih khat tihsual an neih hnuah hi chuan tihsual nei tawh lo tura beisei an ni a, mahse hetiang zat tihsual a awm chho reng a nih chuan thawktu indaih loh vang te pawh a ni thei ang a; mahse ‘repeated error’ a awm tawh chuan ‘inthlahdah’ vangah puh a nuam ber awm e.
Eng pawh ni se, thil thlen dan enin, siam that tur hi chu a awm chiang a ni. Chu chu dawhkan pakhat kila sawi ho theih a pawimawh ber ang a. Tuna kalphung hi kan zo lo a nih chuan, MSU lamin rawtna an rawn thlen, “Controller of Examination pahnih siam a, pakhatin Group-A & Group-B gazetted hna lak leh kaisan zawng zawng buaipui, pakhat dangin Group-B non-gazetted chin hnuai lam hna lak leh kaisan zawng zawng buaipui” tih hi a pawmnahawm deuh ber niin a lang ta awm e.
MPSC leh zirlaite
