Mizoram Public Service Commission laka thil phut neiin Mizo Zirlai Pawl chuan August 6 atang khan MPSC pisa kawtah an pungkhawm a, vawiin – August 7 hian an chhunzawm ang
MZP Gen. Hqrs huaihawtin Ningani khan MPSC kawtah pungkhawmin, MZP Headquarters Manipur vice president James Vanlalhluna’n chatuan ram a pansan thu an hriat avangin chawhnu dar 2.00 ah punkhawm hi an titawp lailawk a. Vawiinah chhunzawm leh an tum tih an sawi.
Zirlaite leh thalai hnazawng mekten MPSC-ah rinna an nghah leh theihnan thil phut hrang hrang an nei tih sawiin, heng hi a hlawhtlin hma loh chuan lungawiloh hi chhunzawm an rel a. Zirlai leh thalai hnazawng mekten MPSC duhkhawp lohna social media kaltlang ringawta sawisel loin, a taka che chhuak turin a sawm tih a sawi.
MZP hian thil phut an nei a. MPSC-ah One Time Registration (OTR) tih tawp nise, need based-in specific application form siam ni rawh se; OTR-a document upload kim loh avanga hnawl zawng zawng chu offline-a document thehluhna hun siamsak rawh se; written exam-a tling tawh, OTR-a document upload kim loh avanga hnawl tawh tan offline-a document thehluhna hun siam sak rawh se; MPSC kalphung siamthat vek ni se, sawrkarin Reform Committee/ Commission din rawh se, tihte a ni.
He hmalakna hian awmzia a neilo a nih chuan, zirlai hna zawng mekten an dikna chanvo an hmuh theihna tur leh MPSC zahawmna humhim a nih theihna turin ke an pen zel dawn tih an sawi a ni.
MPSC pisa kawtah pungkhawm
