Kar kalta Inrinnia Mizoram Rural Bank Branch Manager Conclave 2026 hmanpuitu chief minister Lalduhoma chuan, Mizoram Rural Bank chu Mizorama bank awm zingah CD Ratio nei tha ber pawl an ni reng tih a sawi a, chhuanawm a tih thu sawiin, “Bank CD ratio a san hian an sum dawn khawm te mipuite tan an pe chhuak tam tihna a ni a; ram hmasawn nan chu chu a pawimawh a ni,” tiin a sawi.
Report-a a lan danin, tun sorkar kum liam taah khan MRB hian deposit cheng vaibelchhia 6526.10 an hmu a, loan cheng vaibelchhia 4129.98 an pe chhuak a, an credit deposit ratio hi 63.28% a ni a; Mizoramah a sâng ber a ni.
Hei mai hi a la ni lo a, kum kal ta chhunga sum che vel kha cheng vaibelchhia 10,656.08 a tling a; hetiang nei thei Regional Rural Bank hi India ramah pali chauh an la awm. An sum che vel 97.36% hi digital financial transaction-in an kalpui tawh a; NE India-ah an sâng ber a, India ram huapin pahnihna an ni bawk. Hetiang dinhmuna ding thei bank Mizoramin a nei hi a lawmawm a, thawktute an fakawmin an chhuanawm takzet a ni.
Mizoram chhul chhuak tho, Mizoram Cooperative Apex Bank CD ratio pawh hi 50% vel nia hriat a ni a, MRB chu tluk lo deuh mah se, Mizoram chhul chhuak ni ve lo, Mizorama bu khuar mek mikhual bank dang tam zawk ai chuan an CDR hi a la tha tho awm e. MRB lamin hlep tam tak an siam laiin, MCAB hi chuan kuthnathawktute hnenah service a pe chhuak nasa ve thung niin a lang a, Mizote tan an hlu dun hle a ni.
Bank CD Ratio sang apiang hi a tha kher lo a, CDR hrisel leh hrisel lo a awm a. Mithiamte chhut dan chuan, CDR 65-80% hi CDR hrisel a ni a; CDR 90% aia tam emaw, 60% aia hniam emaw hi chu CDR hrisel lo a ni. CDR hi a san lutuk chuan depositor-ten pawisa lak chhuah tur an nei lo thut thei a, bankruptcy a thleng thei. Khawvela bankruptcy lian ber ‘Lehman Brothers bankruptcy’ pawh kha CDR a san uchuak vang nia sawi a ni. CDR a hniam lutuk hian, Bank-in profit a siam tam lova, hlawkna a neih loh avangin bank mutthlu a ni a, mipuiin an tawrh phah bawk.
Eng pawh ni se, Mizoram chhul chhuak Bank pahnihte hi Mizoram mipuite tan an hlu hle a, a tihlu zual turin hnam rilru pu chunga Mizo mipui ten kan dawr thiam a pawimawh dawn hle niin a lang.
MRB chhuanawm
