MSL 11 – Chhinga Veng BC
Vawi 4 champion thei coach Afela kaihhruai!
Chhinga Veng BC hian MSL an vawi khat khelhna tur a ni nang a; he veng hi Mizorama inelna lian tham zawng zawngah an champion vek tawh thung – MSL tih lohah zawng!
Azawl chhuah lam veng hian football, cricket, volleyball leh badminton thlengin champion trophy an kawl kim tawh a, an veng inlungrualna hian eng tiat nge an nih MSL 11 ah hian a tarlang ang.
Mizoram basketball huanga tawnhriar ngah rual: Faksanga, Mafela, Dede-a, Zorina te karah hian an veng tlangval Hriata (Aizawl East II basketball tourney, 2025 MVP) te an kawl a, team vantlang chu an ni thei lo.
Nikum 2025 khan MBBA Inter Veng basketball tourney neih a ni a, Dede-a khan an veng Dawrpui Vengthar kha squad chhah lo mah se quarter final a hruai thleng tlat – ani hian team nikum anga a thuikhawm that chuan MSL history a coach hlawhtling ber Afela ho hian barakhaih borual MSL 11 ah hian an pai lut ang – hei tak hi he club tantute tana nghahhlelhawm a ni.
Thlirlet thuak ang
He club hi kum 2012 khan din a ni a, dividion 3 ah an inziak lut nghal. An nghah fe hnu kum 2022 khan division 2 ah inhlang kaiin, kum 2024 khan division 1 ah kaiin an champion zui nghal a, hetiang hun an thlen theihna tur hian an veng tlangval Mapuia leh Ronald-a ten club tana tha an thawh zawng zawng hi hahni hil vek khawpa sawi tur a kuh tul – anni pahnih hi a taka thlantui per chuai chuaia tha thawha pen chhuak thin an ni.
Chhinga veng BC hian inter dist., D league tih ang renga an champion boruak te chu thamral tawh mah se – hei MSL 11 kawngkapuiah dak lutin champion tumin an bazar ta e!
East II bialtu MLA
Pu B. Lalchhanzova hovin an phur!
Club puipa lam an phur bawk a, an club secretary Akima hovin hma an la nasa hle. MSL ah hian senso a tam tham em avangin an club chairman Dr. Jerry-a pawh a inseng malh malh hle.
Heng karah hian chhantu Chhanzova a rawn inlar a, kut beng thawm chu ring tak a ni.
East II ah hian Saron BC an awm a, Chhingaveng BC an awm tel cheu bawk – a hming a pu zo tlat an bialtu MLA in, a chhan zo, an mamawhah he club pahnih hi! Thalaite khawvel man pha bialtu MLA an nei hi he veng pahnih vanneih bikna a ni.
Team list
1. Dennis Lalmuanpuia
2. Chawnghmingthanga
3. Vanlalhmangaihsanga
4. R. Lalfakawma
5. C. Lalmalsawma
6. Steven Lallungmuana
7. Lalhriatzuala
8. Gilmore C.Lalthasanga
9. F. Vanlalhlua
10. David Lalruatfela
11. Zorinpuia
12. C. Lalrinfela
13. Vanlalchhuanawma
14. Vanlalruata
Coaching staff: Lalruatfela & Joel Lalthansanga, Ronald Rothlengliana
Physio: Ruthi Vanlalniengmawii