Mizoram Super League (MSL) 11 ah thil mak a thleng – Zarkawt BC hnehin an awm a, Zemabawk BC in an hneh! Zemabawk BC chak chhan hi sawi zui tur a tam a, sawi hmaih thiang lo erawh thil pathum a awm – Ropuia, Shashank leh Zemabawk mipui R. Dengthuama Indoor Stadium-a fuankhawmte vang a ni!
Zemabawk BC hian league round lama an lo ngam tawh loh Zarkawt BCA lakah hian 81 – 74 in hnehna hlu tak an chang a, semi finals game 2 a pawimawh zui ang.
March ni 26, 2026 zana inkhel hmuhnawm fal nalh bikah hian Zemabawk BC lamin bul an tan tha zawk a, Ropuia khel a langsar fal nalh. Ani hian point 27 neiin, pressure sang zet hnuaia freethrow vawi 8 atanga vawi 7 a lut thei kha a pui hle – Ropuia ropui zan a ni!
ZBBC tan hian hun chang tam ta vak lo Shashank J Raj-an second half-ah team pahnih inkhel intluktlang tawk tak karah player of the match hlawhchhuak turin minute 15 chhungin point 22 a nei thei a, luh tuma a theh 3 points vawi 6-ah vawi 4 a lut thei bawk kha an chakna hnar a ni chiang hle.
Tualchhung tlangval Thianga (13 pts) leh Pratyanshu Tomar (12 pts) an khel a tha zui bawk nen, ZBBC head coach Sangpuian a player 9 ngawt mai a khelh tir a, thutlukna a siam fuh tawk lohna thin ni a lang player rotation lamah a fakawm ta riau mai. ZBBC hian an harsatna thin lai ber player siksawina lama an buaina an chingfel tawhin a lang!
Zarkawt BCA lamah hian double digit point nei pha 5 lai chu an awm. Zonuna (18 pts), Sangsanga (11 pts), Arvinder (10 pts), R-a (12 pts) leh The Robot Caio (12 pts) te an ni a, mimal che tha fal an awm lo erawh ZBBC leh BCA inkar tizautu a ni.
Zarkawt BCA hun hmasa lam, nikum MSL X thlenga an thapui an club follower-te an reh ta pharh mai – he club hian tho chhuak leh thei turin theihna an nei a, inhawrkhawm that erawh an mamawh tih a chiang ta reng. MSL, an lal ram hi an hloh mai erawh rin a la har talh e.
MSL 11 – Zemabawk BC-in Zarkawt BCA barakhaih! Ropuia leh Shashank-a tan zan chhinchhiahtlak
