MSL X: Zarkawt BCA hnuaiah Chanmari BC
The Wizard Lalrina Renthlei – 23 pts!
Sharda University Mizoram Super League X ah Chanmari BC in league round lama an hneh tawh Zarkawt BCA chu hneh lovin 79 – 85 in an tlawm!
Relegation playoff 2, game 1 lamah Champhai BC in Electric BC chu 86 – 75 a hnehin, Champhai BC captain Ropuia (26 pts/7 Reb/4 Ast) a che ropui hle – player of the match a ni zui nghe nghe.
The Wizard
Mizoram basketball a roreltu Zarkawt BCA hian Indian national basketball player ni pha, Mizoram pawn club-ah pawh vawi duai lo khel chhuak tawh, Indian basketball a hriat hlawh leh hming lian – The Wizard, Lalrina Renthlei, Tuikhuahtlang val, a chanchin lehkhabu meuha ziah tawh an nei hi inelna sang semi final-ah an nihlawhpui leh ta – ‘Player of the match’ a ni a, Mizo basketball-ah GOAT debate a ngai ta lo!
Mittui a hnai!
Zarkawt BCA danglamna chu an tualchhung player-te hi hnam dang MSL khel tura rawn kal ten an thiamna leh theihna an hmu a – an zah tlat zel bik!
MSL X a inherchhuak a, Mizoram basketball chanchina an hming dang ngai tawh lo tur player tam tak chu an chawlh hun inrinsiak thawm a ring ta hle.
An vanglai hun tha zawng zawng mi hriat phut lo leh beisei hauh lovin Mizo hnam tan an hlan a, hnam dang hmaa Mizoram jersey hmachhuana thlantui nen theihtawpa bei hram hram thintu – Matthew Sailo, Zarkawt BCA captain chawlh hun hi MSL X tawp rual hi a ni thei ta tlat!
Hnam dang palian leh thahrui ngah zawng zawngte lo dang a, lo chhu chat thintu he Zarkawt pa, fit 6’5 hian uitu leh inkhel zel tura duhtu a ngah – player danglam ‘the gentle giant’ hian a jersey la khai lul suh se.
Tuikual South basketball chanchin chhinchhiahnaa hming lian ber Dina (the general) hi eng club-ah pawh khel se 1st five ni phak lo a ni ngai lo; Ramhlun pumhuapah player tha bik thlan ni ta se, Michael F hmaih a thiang lovang…
Anni pawh hi an vanglai hun tha a liam mek zel a, MSL X hnu lamah hian top league player ni zel turin thutlukna hautak siam an hun ve tan ta…
Anni ho bakah hian inkhelh mangtha mai hmabak an ther ta fur; hnah hlui hi hnah thar kiangah la inzep rih mawlh teh se.
Inkhel thlir thuak ang
MSL X, Semi finals 2 – R. Dengthuama Indoor Stadium-ah mipui an pungkhawm a, veng inthenawm inkhel hi boruak a dai dup!
Best of three series hmanga inelna hi a hmuna chhimtu zingah basketball ngaina veng hrang hrang atangin an fuankhawm.
Chanmari BC tan an foreign player zaidam GD Magee (35 pts) an a thawhhlawk leh pek hle a, a kiangah big Mike (12 pts) a khel tha hle – BCA player Justin layup lut tur a lo block te chu inkhel boruak siam haktu a ni phak! Chaltlang tlangval Samson-a (10 pts) hi khawi hmunah pawh a insiam rem zung zung a, contract thar hmui takin a hmuakin a rinawm.
Kanan val Nuna (9 pts) a reh hle! Chanmari BC tan players pasarih an inlan a, an bench player panga erawhin khelhna hun an nei lo – hei hian inkhel boruak san zia a hril awm e.
Hun tawp lamah Chanmari BC lam hian hnehna chan theihna hun remchang an neih erawh an chhawr lo – game 2 erawh a dan a dangin a rinawm!
Zarkawt BC tan MVP ni lai Lalnunpuia Renthlei (R-a) inhliam hi chanchin chhia a ni!
Zonuna (12 pts) leh Matthew Sailo (7 pts) hian full time an khel – anni pahnih hi court chhungah full time an awm chuan Zarkawt BCA game hahdam san theih loh tihna a ni!
Sawisel hlawh fo Cunningham (22 pts) hi kaihruaitu an awm tih a game-ah a lang ta – player thununtu an fak awm.
Court chhunga minute 16 leh hmanga point 12 neitu, a 2 pts field goal pawh 6/6 lai ni thei Justin Gnanaraj hi BCA tan inkhel pawimawhah a hlu zual sawt ang.
Khelhna hun chang lo mah se, team tana phur taka au thei reng Zarkawt BCA bench luahlumtu te hi thahrui hlang an ni – entawn an phu.
Hoops Mania Time Out
“R. Dengthuama Indoor Stadium hi a hmun panna hla deuhin, stadium lian viau mah se, inkhel entu mipui pungkhawm tam tak an awm thin a – MSL board leh MBBA hmingin lawmthu ka sawi takzet.
“Inkhel a hmuhnawmin a pawimawh tual tual a, a hmun ngeia inkhel rawn en zel turin mipuite ka sawm che u. “Zonet Cable TV Pvt. Ltd. lamin Youtube lama inkhel en theihna remchang an siam hi a hmuna lo kal thei lo te tan pawh lo thlir thin turin ka sawm che u,” tiin Pu R. Lalnunpuia, MSL chairman leh MBBA president ni bawk chuan The Aizawl Post Hoops Mania a hrilh.
MSL Knockout Round
April ni 11, Zirtawpni Zan
Relegation 2, Game 2
Electric Veng BC vs Champhai BC 5:30 pm
Semi finals 2, Game 2
Zarkawt BCA Vs Chanmari BC – 8:30 pm