MSSC tobul leh a hnuhma thenkhat

Tarlan tawh angin Mizorama infiammite inpui Mizoram Sport Council (MSSC) Golden Jubilee lawmna pui ber chu Thawhtan tlai khan neih a ni a. MSSC tobul leh a hmalakna hrang hrang; a hnuhma hnutchhiah langsar zual kan tarlang ang.
A tobul
April ni 20, 1976 khan Executive Order hmangin, Mizoram sawrkar chuan Mizoram State Sports Council a din a. Kum sawmhnih-paruk hnu, kum 2002 khan
Mizoram Legislative Assembly chuan Mizoram State Sports Council Act, 2002 pawmin,Council chu sports inrelbawlnaa thuneihna sang tak neiin a siam ta a, ‘Mizo Infiammite Inpui’ tih mai turin a indin nghet chho ve ta zel a ni.
Mizoram State Sports Council member hmasa berte chu hengte hi an ni:
President : Dr. H. Thansanga, Minister i/c Education
Vice President : Pu Lal Thanhawla
Secretary : Pu Zolura, Special Officer for Scouts and Guides & Youth Welfare Activities.
Treasurer : Pu J. Lalduhawma, State Social Education Officer
Members :
Pu Hranthanga, Dy. Director of Education
Pu L. Pachhunga, ADC
Pu S.H. Pautu, Lecturer, PM College
Pu C. Khenglawt, DGP
Pu K.L. Rochama, MLA
Pu H. Rozika, Addl. Secy (Finance)
Council inrelbawlna:
Council kaihruai tur hian Sports & Youth Services Department Minister chu President nihtir nghal zel a ni a, Secretary leh Financial Secretary te chu sawrkar-in a thlang/ruat thung. Vice President leh Joint Secretary te erawh
Council Member zing atanga a thlana thlan chhuah ngat an ni thung. Member zingah Sports & Youth Services Department Secretary, Joint Secretary, Director, Joint Director te an tel nghal a, Finance Department leh Planning Department-a Secretary te hi an ni bawk. Council hnuaia State Level Sports Association tin aiawh pakhat theuh, an vaiin mi 34 bakah term kal lai mek, Act kan neih tan kum atanga chhiara 8th Council tia kan sawi maiah hian non-official nominated member 3 an awm mek bawk. A tan tira Council member mi 10 kha tunah chuan member 46 zet a nei mek.
Council hian President 19, Vice President 12, Secretary 12, Joint Secretary 8, Treasurer 7
leh Fin. Secretary 6 ve ta a, Council member phei chu za chuang an awm tawh a ni. Council hi Sports & Youth Services Department (Secretariat leh Directorate) hnuaia awm a ni chungin mahnia inrelbawl thei tura thuneihna sang tak nei a nih angin MSSC Act 2002 bakah MSSC Rules 2005 a nei a. Thawktute tan Recruitment Rules hranpa neiin a awm.
Office record hmuh theih chinah MSSC-in annual budget a neih hriat hmasak ber chu Financial Year 1983-1984 a ni a, hemi kum hian Rs. 2.70 lakh a nei ve ran a. Budget hi pung chho ve zelin kum 20 liam hnu, 2003-2004 ah chuan Nuai 106 niin, kum 20 dang a liam leh hnu. kum 2023-2024 ah chuan Nuai 1,299.41 a ni ve ta. Kuminah hian Nuai 1,378.54 a ni chho ta bawk.
MSSC hmalakna langsar zual
MSSC hnuaiah hian State Level Sports Association 34 an awm mek a, anni hi Council Banpui tak takte chu an ni.
District Sports Committee hi Council-in a din a ni a, tunah hian DC kaihhruaina hnuaiah DSC 11 an awm mek.
State Level Sports Association 34 te tanpui nan budget-ah nuai 215.50 dah a ni a. District Sports Committee 11 tan nuai 23.35 a dah ve bawk. Other Promotional Fund-ah nuai 159.25 leh Sports Science atan nuai 2.5 dahin sports kaihhnawih tul hrang hranga hman tur chu nuai 402.60 a ni.
National leh international inelnaa tel tur te, training leh coaching camp kal turte puih nana sum dah hran atangin kum 2025 chhung khan infiammi 50 hnenah tanpuina pek a ni. Sum indaih lohna a awm chuan hmun danga mi pawh Council pawmpuinain pawh pen mai thin a ni bawk.
Club leh association te tanpuina atana sum ruahman atangin kum 2025 chhung khan club/association hrang hrang 25 hnenah tanpuina pek chhuah a ni. Sports goods mamawhtu apiang hnenah a tul angin quality tha tak pek chhuah thin a ni bawk.
MEDAL: Kum 2025 chhung khan National Level Competition-ah Medal la thei Sports Association 15 an awm, a vaiin medal 211 an sual chhuak. International Level Competition-ah chuan Mizoram Arm Wrestling Association leh Mizoram Badminton Association player ten medal hlawh chhuakin Mizoram tan medal 5 an rawn hawn.
Tuipuiral leh Tuichangral Games :
Kum 2025 atang khan tuna President ni mek Lalnghinglova Hmar, Sport Minister hmathlir Vision 2036 Olympics peng pakhat atan Tuipuiral leh Tuichangral Games-ah Boxing, Archery, Weightlifting leh Wrestling telh thartir niin, PMJVK sum atangin GSA pahnihte hnenah Rs. 50,000/- ve ve pek a ni a, Association 4 te pawh Rs. 1,00,000/- zela puih an ni thei bawk. Kum tharah chuan GSA te hi Rs. 1,00,000 pek an ni dawn.
Non-Residential Coaching Programme: Non-Residential Coaching programme hmasa ber chu July 13, 2022 khan hawn a ni, a a bul tan nan discipline hrang hrang parukah coaching kalpui a ni. Tunah hian discipline 10 – Athletics, Basketball, Boxing, Football, Hockey, Judo, Table Tennis, Tennis, Weightlifting leh
Wrestling- ah kalpui niin centre 16-ah trainee 418 (mipa 329 leh hmeichhia 87) ten ngawrh takin training an nei mek a ni.