Zan khat riaka Mizoram tlawha lo zin Union Textiles minister Giriraj Singh chuan Thawhtanni khan Mizoram Handloom and Handicrafts Development Corporation Limited (ZOHANDCO) office a tlawh a. Sericulture minister Lalthansanga’n a tawiawm. Union minister pualin ZOHANDCO hian exhibition a buatsaih a, Mizo puantah hrang hrang leh thiamhnang deh lam hawi an siam chhuah, an pholan chu a hmunah a en. Puantahtute leh sumdawngte nen an inkawm bawk.
Silk vang leh tha bika an sawi – Muga silk chu Mizoramah a that duh avangin ‘Golden State’ tih hiala koh a duh tih a sawi a. Kum 2035-ah chuan silk metric ton 1000 aia tam an dehchhuah theih ngei a beisei tih sawiin, sawrkar laipui chuan kuthnathawktute hmasawn zelna atan sum pek chhuah a ui lo tih a sawi. Hmeichhe chawikan a pawimawh, tiin, ‘Lakhpati Didi’ scheme chu tangkai zawka hmang turin puantahtu nuho a chah a; he scheme hnuaiah hian cheng nuai 5 thleng pek theih niin, nuai 10 thlenga dawn theiha siam tum a ni tih a sawi.
Union Textiles minister hian sawrkar laipui Textiles ministry atangin officer tawiawmtu engemawzat a hruai a. Heng a team hruaite hi zin satliah ni loin, Mizorama Sericulture department thanzelna atan, farmer-te hmasawnna tur leh Mizoram mipui thatna ngaihtuah tura lo kal an ni tih a sawi.
Weavers’ Service Centre (WSC) Eastern Zone zonal director S Bandyopadhyay chuan Guwahati-a pilot project an kalpui mek – ‘market led model’ chu Mizoramah kalpui ve an tum tih a sawi a. He market led model-ah hian WSC hnuaiah training buatsaihin, trainer-te hnathawh tur zawnpui an ni a. Training an neih mek laiin mipui lei duh zawng leh hralh tla tur an zirchiang a, chumi mil chuan trainer-te zirtir an ni. A hralhna tur zawnsak nghalin, training an neih mek lai pawhin an thil siam chhuah hi hralh sak nghal an ni. WSC-a train chhuakte hian kum khatah cheng nuai 5 tal hlawh chhuak thei turin hma an lakpui a ni.
Union minister hian SAMARTH training certificate leh e-Pehchan card a sem bakah Yarn Passbook leh Artisan ID card sem a ni al Certificate of Appreciation of Workshed, Frame Loom & Lighting unit chu Lalramthangi hnenah hlan a ni.
Ministry of Textiles leh Central Silk Board hotuten an rawn tawiawm a, Mizoram Sericulture secretary Florence Zotluangpuii hoin department hotuten a tul angin an lo buaipui a ni.
Muga silk thatna Mizoram hi ‘Golden State’ tih hial tlak ani: – Union Textiles minister
