Mugello tlankawngah Marquez chak ber
Inrinnia intlansiak aitechhinna sprint race-a hnehna a chan hnu nimin 2025 MotoGP Italian Grand Prix-ah championship hmahruaitu Spaniard Marc Marquez bawk pakhatna a ni leh a, a career-a MotoGP race hnehna tum 93 a chan tlinna chiah a ni.
He Mugello double avang hian rider standing lamah Ducati star hian point 40-in amah hnaihbertu leh a nau ni bawk Gresini Ducati rider Alex Marquez a kalsan ta a, a hmahruaina a chhah belh sawt.
Pathianni Mugello tlan -kawnga Italian GP-ah Marquez naupang zawk hi pahnihna niin, Marquez unau podium lawn lai hmuh tur a awm leh a; lawmman semna dawhsan hniam ber luahtu pathumna chu VR46 Ducati rider Fabio Di Giannantonio a ni thung.
Kum 2014 hnu lama Italian Grand Prix-a hnehna chang leh ngai ta lo Marc Marquez hi Pathianni zet chu Mugello track-ah a chungnung larh a; pole changin, sprint-ah a chak phawt a, Pathianni intlansiak tak takah hnehna chang zui lehin, kumin Italian Grand Prix-ah a ‘hat-trick’ lai hmuh tur a awm ta a ni.
Nimin intlansiak tir lamah a team-mate Pecco Bagnaia leh Gresini Ducati rider Alex Marquez-te’n tlanrual thuak thuak mah se Marc Marquez hian chona lian lutuk hmachhawn tluanchhuak loin hnehna a chang a, chequered flag vaikhum a nih laiin 1.942s-in a fal.
Tun kha Ducati tan an home soil-a hnehna tum li an chan zawnna ni tawhin, an rider chhuan vawr Marquez chuan championship-a a hmahruaina a sawhnghet leh sauh a, kartawp hian Dutch Grand Prix lamah title a beisei mekna sawhnghet turin hnehna a beisei zui leh ang.
A u lakah chak zo lo mah se Alex Marquez pawhin standing lama pahnihna dinhmun a luah mek a sawhnghet ve sauh bawk
Mugello tlankawngah Marquez chak ber
