Mizoram Universal Health Care Scheme-in a huam tel, sawrkar laipui health care scheme AB-PMJAY hnuaia Golden card neite chu state health care hmangtu zingah a tam ber leh, a sum zawng pawha a kal ral tamna ber a ni.Mizoram State Health Care Society hotute sawi danin, MUHCS 2.0 ah mi 320123 inziaklut atangin AB-PMJAY a awm sa mi 222943 an awm a; MUHCS hmang thei zawng zawng atanga chhutin zaa 70 a ni pha. Nikumah pawh heti zat tho hi AB-PMJAY-a awm an ni a, ABPMJY-ah hian sawrkar laipuiin chhungkaw pakhat tan inziahluhna (premium) man Rs. 1052 a rawn pe a, central leh state intum sem tur hi 90-10 niin, tuna hemi hmang theitu awm atanga central-in inziahluhna (premium leina) man a rawn tumsak chu cheng vaibelchhe 20.5 niin, MUHCS atana inziahluhna man chi hrang hrang atanga lutkhawm atangin ABPMJY-in a tum hi zaa 9 a ni.
Hetihlai hian MUHCS 1.0 hman hun lai, 2025- 2026 chhunga damdawi ina inenkawlna thehluh (claims) 108518 zinga 68938 chu ABPMJY hmangtute niin, zaa 64 a ni. Sum hman zawng zawng cheng vaibelchhe 171.55 atangin vbch. 60.79 an hmang a ni.
Central atanga ABPMJY atana sum hmuh vbch. 20.5 atanga chhutin, state sawrkarin a lo doletna vbch.5 vel paih lehin, central scheme – ABPMJY atana state sawrkarin a hranpaa sum a lo sen chu vbch. 35 vel a ni tih an sawi. Premium leina a rawn tumsak bak hi chu, a hranpa in an indaihlohna atan sum pek belh an rawn nei thei chuang lo tih an sawi bawk.
Zawhna chhangin MSHCS hotute chuan, ABPMJY hnuaia awmte chu state sawrkarin a policy – MUHCS ah hian a telh miau avangin sawrkar tan chuan sum ‘hlohna’ a ni tihna a ni kher loa, sawrkar chuan tul a tih ang leh a inhuam anga kalpui zel mai tur ni ah an ngai tih an sawi.
Chutihlaiin, ABPMJY hmang theitu chu sawrkar laipui ruahman angin ‘mirethei’ huamchhung ami an ni tur a ni a, Golden card nei zingah tuna khawsak harsa ta lo takte, sawrkar hnathawk hial pawh an awm thei tawh a, a hmang theitu hi che ve reng thei an ni a, miin a card hi a ‘surrender’ miau loh chuan Golden card hmang thei zingah chuan a awm reng thei lawi tih an sawi a ni.
MUHCS hmang tangkaitu zingah AB-PMJAY hmangtu sang filawr
