Myanmar-a lakluh tum Tata Yodha 10 Lawngtlaia YLA AOC Branch-in an huamchhunga an lo man chungchangah Ningani khan Lawngtlai bawrhsap Donny Lalruatsanga hoin a kaihhnawih sawrkar aiawhte, tlawmngai pawl leh MJA lam an thukhawm.
Bawrhsap chuan, raltlante mumal zawka khuahkhirh leh Myanmar nena sumdawnnaah fimkhur taka hma lak mek a ni tih a sawi nawn a. A bikin raltlante tan inkhuahkhirhna leh sumdawnna kalpui chungchangah mumal taka dan siamfel tawh a ni a. Hemi atan hian LADC nen pheikhairual taka thawk dunin, NGO ten thahnemngai taka an thawhpuinaah lawmthu a sawi tih a sawi a ni.
Lirthei lut leh chhuakah thuneitute hriatpui loha endik leh pawisa lak ching an awm thin nia thuthang awm chu pawi a tih thu sawiin, hetiang zawnga hmalak chingte zawngchhuakin dan anga hma lak a ni dawn tih a sawi.
Dan loa lirthei lo lut man tur a awm fo chu pawi a tih thu bawrhsap hian sawiin, thupek kenkawh kawngah district administration-in theihtawp a chhuah zel dawn a, sawrkar hmalakna tawiawm fo turin tlawmngai pawl leh Lawngtlai mipui a sawm tih a sawi bawk.
Central YLA hruaitute chuan dan loa sum leh pai khawn chungchangah theih ang angin hma an lak mek tih an sawi a. Dan leh thupek kenkawh kawngah district administration hmalakna an thlawp tlat a, an theih chin chinah chak taka hma an lak zel tur thu an sawi a ni.
Thutkhawm chuan, sumdawnna kalpui chungchangah district magistrate thuchhuah awm tawh chu tha taka kenkawh nise, hemi atan hian kawng engkimah thawhho nise, an ti a. October13 zing dar 2-3 inakara YLA AOC Branch-in Tata Yodha 10, Aizawl lam atanga lokal an man chu Enforcement (DTO) kutah hlan a nih thu sawi a ni. District magistrate thuchhuah palzuta dan loa kal a nih angin, hemi chungchangah hian a dealer-in intiamkamna a nei thei a nih chuan lirthei hi thawn let nise an ti.
Myanmar-a lakluh tum lirthei thar mansak chungchang sawikhawm
