Myanmar sipaite chuan state of emergency an puan chu thlaruk atan pawtsei lehin August thlaa inthlan an tiam chu tihkhawtlai a ni leh ta a ni.
Southeast Asian ram hi kum hnih kaltaa Aung San Suu Kyi sorkar paihthlak a nih hnuah sipai tena lungawilote hmehmih tuma an beih zui bawk vangin civil war in a la tuam mek a ni.
Civilian sang chuangin nunna chan phah tawhin sipai sorkar duh lo tam tak te leh rebel group military rule duh lo te nen inbeihna a thleng mek reng a ni.
Acting President Myint Swe chuan National Defence and Security Council (NDSC) meeting neihnaah state of emergency chu August 1, 2023 atanga thlaruk chhung atan pawhsei a nih thu a puang a ni.
Myanmar military tena kum 2008 constitution an siam tuna la hman mek rengah state of emergency hlih a nih atanga thlaruk chhungin inthlanna neih ngei tur tih a ni a. A hmain sipaite chuan kumin August hi inthlan neih hun tur tia an puan a ni.
Army Chief Min Aung Hlaing chuan council meeting neihnaah Sagaing, Magway, Bago leh Tanintharyi regions bakah Karen, Kayah leh Chin states-ah te inbeihna a la thlen reng thu a sawi a.
“Hun kan mamawha inthlanna neih a nih theih nan awmze neia inpuahchahna kan mamawha hmanhmawh thei kan ni lo,” tiin a sawi. Junta te hian kumin hian emergency ordinance an lo tichhuak tawh bawk a.
Min Aung Hlaing chuan sipaite chuan Myanmar-a khua hmun thuma thena hmun khat chu an thunun loh a la awm tiin a sawi bawk a. Anti-coup “people’s Defence Forces” te chuan junta te hi che hleithei lovin hmun hrang hrangah an siam mek a ni.
Junta te hian khua halin, mi thatin air strike leh artillery te hmangin anmahni dodaltute chu an bei mai zel tiin rights group te chuan an sawi bawk a ni.
Myanmar-in emergency pawtsei
