Nikumah ram hrang hrangten beihpui thlak nasa hle mah se Thai ramri bul, Myanmar-a online scam center (mi buma hren behna)-ah mi 5,300 chuang an la tang niin mihring dikna chanvo humhalhtu pawlin an sawi.
Thailand-a Civil Society Network for Human Trafficking Victim Assistance (CSNHTV) chuan Thailand police hnenah hma la tura ngenna lehkha an thawn a. Tang zinga tam tak chu Myanmar Democratic Karen Buddhist Army hel pawl thununna huam chhung hmun liah niin ram dang mi an nih thu an sawi.
CSNHTV chhinchhiah danin mi 1,600 vel chu Chinese an ni a, mi 200 vel Myanmar mi an ni a. Philippines, Taiwan, Malaysia, Brazil, Russia, Kenya, Uganda, Rwanda leh Zimbabwe mite pawh an tel.
“Hetiang hmun awm tam tak hi tihchhiat emaw, a tangte chhanchhuah emaw a la ni lo va, a tuartu chhuah an la ni lo,” an ti.
“Hei vang hian hetiang ti thin pawlte hian online-a bumna leh mihringa sumdawnna an khawih chhunzawm zel a, khawvel hmun hrang hrangah, a bikin US leh Europe-ah a tuartute tan harsatna a thlen,” an ti.
Asia chhimchhaka scam centre hrang hrang, Myanmar leh Cambodia-a an chin takte hian dan lovin online scheme an kalpui a, khawvel puma mi bumna atana an hmang a ni.
Heng centre-te hi helai velah hian COVID-19 len lai khan a pung nasa a, a tirah chuan dan dik lo taka casino khelhna hmun leh online-a inthapna nen a inzawm a. Tunah erawh chuan dollar tluklehdingawn tam tak vir velna industry a ni tawh tih UN chuan a tarlang.
February thlaa UN report chuan heng hmunah hian ram dang mi, mi sual pawlten an hralh leh tihduhdahte an thawk tam ber niin tar lan a ni.
Heng hmunah hian ‘hremna leh tihduhdahna, mipat hmeichhiatna hawia tihduhdahna leh hman sualna, nau paitir luih, ei tur tlakchham, khung hran leh mihring dikna chanvo tihchhiatna nasa tak dangte’ a thleng tih an sawi.
UN Human Rights hotu, Volker Turk chuan, “Hetiang taka intihduhdahna a mak hle a, thinlung pawh a tina tak zet a ni,” a ti.
Myanmar scam centre-ah mi 53,00 chuang tang la awm
